இலங்கையினால் ஏற்றுமதி வருமானத்தை இரண்டு மடங்காக அதிகரிக்க முடியுமா?

இந்த ஆண்டின் முதல் ஏழு மாதங்களில், வணிகப் பொருட்கள் மற்றும் சேவைகள் என மொத்த ஏற்றுமதிகள் 6.7 சதவீத வளர்ச்சி அடைந்து, 12 பில்லியன் அமெரிக்க டொலர்களை எட்டியுள்ளது. இது ஏற்றுமதி வர்த்தகத்தில் சாதகமான நிலையை காட்டுகிறது.

- ரொபட் அன்டனி

ஜூலை மாதத்தில் மட்டும், வணிகப் பொருட்கள் ஏற்றுமதி இதுவரை இல்லாத அளவில் 1.3 பில்லியன் அமெரிக்க டொலராக உயர்ந்துள்ளது. இந்த வலுவான ஏற்றுமதி வளர்ச்சி, இறக்குமதியை விட அதிகமாக இருப்பதால், நாட்டின் வர்த்தகப் பற்றாக்குறை சுருங்கியுள்ளது என்று மத்திய வங்கி குறிப்பிட்டுள்ளது.

அந்த வகையில் இலங்கையின் ஏற்றுமதி வருமானம் அதிகரிக்கின்ற போக்கை வெளிக்காட்டுகின்றமையானது ஏற்றுமதி வருமானத்தை இரண்டு மடங்காக அதிகரிக்க முடியுமா என்ற கேள்வி எழுகிறது. காரணம், இலங்கை தொடர்பில் அறிக்கையொன்றை வெளியிட்டிருந்த உலக வங்கி இலங்கையினால் ஏற்றுமதி வருமானத்தை இரண்டு மடங்காக அதிகரிக்க முடியும் என்ற கருத்தை வெளியிட்டிருந்தது. அதற்கான வேலைத் திட்டங்கள் எவ்வாறு முன்னெடுக்கப்பட வேண்டும் என்பதும் உலக வங்கி சுட்டிக்காட்டியிருந்தது.

எட்காவில் யோசனை முன்வைக்கப்பட்டது. ஆனால் அது அப்படி நடக்கவில்லை. அதனைச் செய்வதற்கு மனதளவில் ஓர் ஊக்கம் வேண்டும். ஆனால் இலங்கையும் இந்தியாவும் ஒரே பொருளை உற்பத்தி செய்ய முயற்சிப்பதாக யாராவது வாதிடலாம். அதில் உண்மையும் இருக்கிறது. முன்னர் ஒரு பொருளை எடுத்தால் இந்தியாவில் உற்பத்தி செய்யப்பட்டது, ஜப்பானில் உற்பத்தி செய்யப்பட்டது. இலங்கையில் உற்பத்தி செய்யப்பட்டது என்ற ஒரு பார்வை இருந்தது. ஆனால் இப்போது அப்படியல்ல. இப்போது "பூகோள உற்பத்தி பெறுமதி சங்கிலி" என்ற திட்டத்துக்குள் உலகம் சென்று இருக்கிறது. இந்தியா, சீனா, தாய்வான், ஜப்பான், இலங்கை போன்ற நாடுகளில் உற்பத்தி செய்யப்பட்டது என்ற ஒரு பொதுவான பெயர் தற்போது வரவேண்டும். அதில் நாம் இணைந்துகொள்ள வேண்டும். உலக உற்பத்தி பெறுமதி சங்கிலியில் நாம் இணைவது அவசியம். எட்கா உடன்படிக்கையில் கையெழுத்திடுவதன் மூலம் இலங்கையிலிருந்து உற்பத்தி செய்து இந்தியாவுக்கு அனுப்புவது என்று அர்த்தம் அல்ல. இந்தியாவும் இலங்கையும் ஒன்றாக இணைந்து உற்பத்தி செய்வது என்பதே அதன் அர்த்தமாகும். இந்தியாவும் இலங்கையும் ஒன்றாக உற்பத்தி செய்து அதனை ஜப்பானுக்கு ஏற்றுமதி செய்ய வேண்டும் என்று குறிப்பிட்டிருந்தார்.