தொடாவிட்டாலும் எம்மை சுடும்

தொட்டால் சுடும் தீ... ஆனால் இங்கு நாம் தொடாவிடினும் எம்மை அடிக்கடி தொட்டு ரசிக்கின்றது தீ.

- குமார் சுகுணா

மலையகத்தில் எவ்வளவோ பிரச்சினைகள் இருப்பதாக நூற்றாண்டு காலமாக குரல் கொடுக்கப்பட்டு வந்தாலும் பேசி பேசி நாட்கள்... வருடங்கள் தீர்ந்தாலும் எந்த பிரச்சினையும் பெரிதாக தீர வில்லை. அல்லது தீர்க்க முடியவில்லை என்றே கூற வேண்டும். இவற்றில் மிக முக்கியமானது குடியிருப்பு. எல்லோருக்கும் தெரியும் இங்குள்ள வீடமைப்பு முறைகள். லய அமைப்புகள்... இரட்டை மற்றும் ஒற்றை லயங்கள். இது ஆங்கிலேயர் காலத்தில் தென் இந்திய மக்களை தோட்டத் தொழிலுக்காக இலங்கைக்கு அழைத்து வரப்பட்ட போது உருவாக்கப்பட்ட குடியிருப்புகளே. ஆனால், இன்று பல நூற்றாண்டுகள் தாண்டியும் இதுவே இன்னும் பெரும்பாலும் குடியிருப்புகளாகவே உள்ளன. இந்த குடியிருப்புகளில் பல தலைமுறை வாழ்ந்து விட்டனர். இப்போதும்

குமார் சுகுணா

வாழ்ந்துக்கொண்டிருக்கின்றோம். பிரச்சினை இது மட்டும் அல்ல. இதனை தாண்டிய பெரும் பிரச்சினை இப்போது தோட்டங்களில் நிலவும் தீ விபத்துக்கள்.

இரட்டை லயம், ஒற்றை லயம் என்பது பிரச்சினை என்றாலும், அந்த குடியிருப்புகளையும் தீ இரையாக்கிவிடுவதனால் பலர் குடியிருப்புகளை இழந்து வருடக்கணக்கில் டெம்பறி சீட் எனும் தற்காலிக குடில்களில் வசிக்கின்ற நிலை பல தோட்டங்களில் நிலவுகின்றன. மேலும், பலர் உறவினர்கள் வீடுகளில் தஞ்சம் புகுவது கோயில்களில் வசிப்பது என நீண்டகாலமாக குடியிருப்புகள் இன்றி அவதி படுகின்ற நிலையும் உள்ளது. மலையக பெருந்தோட்டங்களை பொருத்தவரையில் தொடர் குடியிருப்புகளில் இந்த தீ விபத்துகள் என்பது அடிக்கடி நடக்கின்ற ஒரு விடயமாகவே உள்ளது. கடந்த வாரம் கூட பூண்டுலோயா டன்சினன் தோட்ட லயன் குடியிருப்பில் ஏற்பட்ட தீ விபத்தில் 6 வீடுகள் சேதமடைந்தன, குடியிருப்பாளர்கள் பத்திரமாக வெளியேற்றப்பட்டனர். தோட்ட இளைஞர்கள் மற்றும் மக்களின் ஒத்துழைப்புடன் தீ கட்டுப்பாட்டுக்குள் கொண்டு வரப்பட்டது, மேலும் யாருக்கும் காயம் ஏற்படவில்லை.