49 ஆவது தேசிய விளையாட்டு விழாவில் 83 தங்கங்களுடன் மேல் மாகாணம் சம்பியன்

49 ஆவது தேசிய விளையாட்டு விழாவில் 83 தங்கம், 55 வெள்ளி, 71 வெண்கலம் என மொத்தமாக 209 பதக்கங்கள் வென்ற மேல் மாகாணம் முதலிடம் பிடித்து சம்பியனானது.

- எம்.எம். சில்வெஸ்டர்

ஆண்களுக்கான முப்பாய்ச்சல் போட்டியில் 16.37 மீற்றர் தூரம் பாய்ந்து புதிய போட்டிச் சாதனையுடன் தங்கப் பதக்கம் வென்று 1098 புள்ளிகளைப் பெற்ற மேல் மாகாணத்தின் பசிந்து மல்ஷான் சிறந்த மெய்வல்லுநர் வீரராகவும், பெண்களுக்கான 400 மீற்றர் ஓட்டப் போட்டியில் தங்கப் பதக்கம் வென்று 1028 புள்ளிகளைப் பெற்ற மேல் மாகாணத்தின் சயூரி மெண்டிஸ் சிறந்த மெய்வல்லுநர் வீராங்கனையாகவும் தெரிவாகினர்.

கடந்த ஆகஸ்ட் 29 ஆம் திகதி முதல் 31 ஆம் திகதி வரையான 3 நாட்கள் காலி தடல்ல விளையாட்டு மைதானத்தில் நடைபெற்ற தேசிய விளையாட்டு விழாவில் நாட்டின் 9 மாகாணங்களிலிருந்தும் நூற்றுக்கணக்கான வீர, வீராங்கனைகள் தத்தமது மாகாணங்களை பிரதிநிதித்துவப்படுத்தி பங்குபற்றியிருந்தனர்.

மேல் மாகாணம் கைப்பற்ற, இரண்டாவது இடத்தை பிடித்த மத்திய மாகாணம் 43 தங்கம், 64 வெள்ளி, 68 வெண்கலம் என மொத்தமாக 175 பதக்கங்களை கைப்பற்றியிருந்ததுடன், மூன்றாவது இடத்தைப் பிடித்த தென் மாகாணம் 33 தங்கம், 52 வெள்ளி, 46 வெண்கலம் என 131 பதக்கங்களை வென்றிருந்தது.