கோறளைப்பற்று நிருவாக சிக்கல்களுக்கு எல்லை நிர்ணய ஆணைக்குழு தீர்வல்ல

மட்டக்களப்பு கோறளைப்பற்று நிருவாக பிரிவில் காணப்படும் சிக்கலுக்கு எல்லை நிர்ணய ஆணைக் குழுவை அமைத்து தீர்வு பெற முடியாது.

- 

மீண்டும் எல்லை நிர்ணய குழு அமைப்பது வேதாளம் முருங்கை மரம் செயற்பாடாக அமையும். இந்தப் பிரச்சினைக்கு தமிழ் மற்றும் முஸ்லிம் பிரதிநிதிகள் ஒன்றிணைந்து பேசி தீர்வு காண வேண்டும்.

ஆகவே தீர்வு காண்பதற்கு விரிவான பேச்சுவார்த்தையில் ஈடுபட தயார் என தமிழ் மற்றும் முஸ்லிம் அரசியல் பிரதிநிதிகள் கூட்டாக வலியுறுத்தினர்.

பாராளுமன்றத்தில் செவ்வாய்க்கிழமை மாலை நடைபெற்ற அமர்வில் சபை ஒத்திவைப்பு வேளையின் போது மட்டக்களப்பு கோறளைப்பற்று நிருவாக சிக்கல் தொடர்பில் பிரேரணையை முன்வைத்து உரையாற்றிய ஸ்ரீ லங்கா முஸ்லிம் காங்கிரசின் பாராளுமன்ற உறுப்பினர் எம்.எல்.ஏ எம் ஹிஸ்புல்லா, 1999 ஆம் ஆண்டு இலங்கையில் புதிய பிரதேச செயலகங்களை உருவாக்குவதற்காக பொதுநிர்வாக அமைச்சினால் நியமிக்கப்பட்ட 'பாணம்பரன' ஆணைக்குழு அறிக்கையில் பிரகாரம் இந்த நாட்டில் 8 புதிய பிரதேச செயலகங்களை உருவாக்குவதற்கு சிபாரிசு செய்யப்பட்டது.

2000.07.13ஆம் இடம்பெற்ற அமைச்சரவை கூட்டத்தின் தீர்மானத்துக்கமைய அந்த 8 பிரதேச செயலகங்கள் உருவாக்கப்பட்டு 25 ஆண்டுகாலமாக இயங்கி வருகின்றன. அவற்றில் 6 பிரதேச செயலகங்கள் ஏற்கனவே வர்த்தமானி அறிவித்தலின் பிரகடனம் செய்யப்பட்டு எல்லைகள் வரையறுக்கப்பட்டு இயங்குகின்ற நிலையிலும் மட்டக்களப்பு மாவட்டத்துக்கென்று சிபாரிசு செய்யப்பட்ட கோறளைப்பற்று மத்தி, தெற்கு என்ற இவ்விரு பிரதேச செயலகங்களும் இன்றும் வர்த்தமானி அறிவித்தலில் பிரகடனம் செய்யப்படவில்லை. இந்த 25 ஆண்டுகாலமாக இப்பிரதேச செயலாளர்கள் தமது எல்லைகளின் பிரதேச எல்லைகள் தெரியாமல் அடிப்படை பிரச்சினைகளுக்கு வாகரை, கிரான் பகுதிக்கு செல்ல வேண்டும் என்று அலைக்கழிக்கப்படுகிறார்கள்.