அகில இலங்கை பாடசாலைகள் நீச்சல் போட்டிகளில் சாதனைகள் படைத்து அசத்திய கிறிஸ்டினா, முஹம்மத்

அகில இலங்கை பாடசாலைகள் நீர்நிலை விளையாட்டுத்துறை சங்கத்தினால் நெஸ்லே மைலோ அனுசரணையுடன் கொழும்பு சுகததாச நீச்சல் தடாகத்தில் நடத்தப்பட்ட 50ஆவது அகில இலங்கை பாடசாலைகள் வயதுநிலை (Age Group) நீர்நிலை விளையாட்டு சம்பியன்ஷிப்பில் இரண்டு மாணவர்கள் தலா 3 புதிய சாதனைகளை நிலைநாட்டி சம்பியன் பட்டங்களை சுவீகரித்து வரலாறு படைத்தனர்.

- நெவில் அன்தனி

ஏசியன் இன்டர்நேஷனல் ஸ்கூல் மாணவி கிறிஸ்டினா பெருமாள், ஸாஹிரா கல்லூரி மாணவன் எம். எவ். முஹம்மத் ஆகிய இருவரும் தலா 3 புதிய சாதனைகளை நிலைநாட்டி முழு நீச்சல் போட்டியிலும் மிகச் சிறந்த ஆற்றல் வெளிப்பாட்டாளர்களாக பிரகாசித்தனர்.

இவர்கள் இருவரும் உலக நீர்நிலை நிறுவனத்தின் தரவரிசையில் இடம்பெறுவதுடன் இலங்கையின் எதிர்கால ஒலிம்பிக் வாரிசுகளாக உருவாவார்கள் என நம்பப்படுகிறது.

பயிற்றுநர்கள், பாடசாலைகளின் அதிபர்கள், பொறுப்பாசிரியர்கள், நிருவாக சபை உறுப்பினர்கள் ஆகிய அனைவரும் தங்களுக்கு அளித்துவரும் ஒத்துழைப்புகள் அளப்பரியதெனவும் என்றாவது ஒருநாள் ஒலிம்பிக்கில் பங்குபற்றி அதிசிறந்த ஆற்றல்களை வெளிப்படுத்த உறுதிபூண்டுள்ளதாகவும் இந்த இருவரும் தெரிவித்தனர்.

20 வயதுக்குட்பட்ட பெண்களுக்கான மார்தட்டு நீச்சல் (Breaststroke) போட்டிகளில் 3 புதிய சாதனைகளை நிலைநாட்டிய கிறிஸ்டினா பெருமாள் அவ்வயது பிரிவில் சம்பியனானார்.

வத்தளை லைசியம் சர்வதேச பாடசாலையைச் சேர்ந்த நவஞ்சனா சிறிவர்தனவினால் கடந்த வருடம் நிலைநாட்டப்பட்ட 3 சாதனைகளையே கிறிஸ்டினா இந்த வருடம் புதுப்பித்தார்.