தங்கமாய் மிளிரும் தம்புள்ள குகைக் கோவில்

தம்புள்ள தங்கம் கோவில் என்று அழைக்கப்படுகின்ற தம்புள்ள குகைக் கோயில், இலங்கையின் பாதுகாக்க வேண்டிய உலக அரும்பொருள் இடமாக 1991 இல் பிரகடனம் செய்யப்பட்டது. இலங்கையின் மத்திய பகுதியில் அமைந்துள்ள இக்கோவில், கொழும்புக்கு 148 கி.மீட்டர் கிழக்காகவும் கண்டிக்கு 72 கி.மீட்டர் வடக்காகவும் உள்ளது.

- 

இலங்கையில் மிகப் பெரியதும் மிகச் சிறப்பாகப் பேணப்படுவதுமான கோவில் தொகுதி இதுவாகும். சுற்றியுள்ள பிரதேசத்தில் 80க்கும் மேற்பட்ட ஆவணப்படுத்தப்பட்ட குகைகளில் 5 குகைகளுக்கு மேல் பிரதானமான கண்கவர் உருவச் சிலைகளும் ஓவியங்களும் உள்ளன.

இவ்வுருவச் சிலைகளும் ஓவியங்களும் புத்தருடைய வாழ்க்கையோடு சம்பந்தப்பட்டவையாகும். மொத்தமாக 153 புத்த சிலைகளும் இலங்கை அரசர்களின் 3 உருவச்சிலைகளும் தெய்வங்களின் 4 சிலைகளும் இங்கு உள்ளன.

இவற்றில் விஷ்ணு மற்றும் விநாயகர் சிலைகள் உள்ளன. 2,100 சதுர மீட்டர் பரப்பளவுக்குச் சுவர்ச் சித்திரங்கள் இருக்கின்றன. சுவர்ச் சித்திரங்களில் மாரா அகரனின் செயற்பாடுகள் மற்றும் புத்தரின் முதலாவது பிரசங்கக் காட்சிகள் உள்ளன.

புத்தர் இலங்கைக்கு விஜயம் செய்வதற்கு முன்னரே, சரித்திரத்துக்கு முற்பட்ட மக்கள் இக்குகைத் தொகுதியில் வாழ்ந்துள்ளனர் என்பதற்குச் சான்றாக, இப்பகுதியில் சுமார் 2700 ஆண்டுகள் பழைமையான மனித எலும்புக் கூடுகளைக் கொண்ட புதை குழிகள் காணப்படுகின்றன.