சரிந்தது ஐ.தே.க. கோட்டை!

தேசிய மக்கள் சக்திக்கு சரித்திர வெற்றி!

- எஸ்.என்.எம்.சுஹைல்

2006 ஆம் ஆண்டு ஐக்கிய தேசியக் கட்சியின் வேட்பு மனு நிராகரிக்க சந்தர்ப்பத்தில்கூட, டம்மியாக போடப்பட்ட சுயேட்சைக் குழுவொன்றை ஐக்கிய தேசியக் கட்சி ஆதரித்து அதனை வெற்றிபெறச் செய்தது. கொழும்பு மாநகர் ஐக்கிய தேசியக் கட்சியின் அசைக்க முடியாத கோட்டையாகவே விளங்கி வந்தது.

எந்தவொரு தேர்தலிலும் கொழும்பு மாநகருக்கு உட்பட்ட பொரளை, கொழும்பு மத்தி, கொழும்பு வடக்கு, கொழும்பு கிழக்கு, கொழும்பு மேற்கு உள்ளிட்ட தேர்தல் தொகுதியில் ஐக்கிய தேசியக் கட்சியே தொடர்ச்சியாக வெற்றிபெற்று வந்துள்ளது. நாட்டில் எல்லா பகுதிகளிலும் தோல்விகளை சந்தித்த சந்தர்ப்பங்களிலெல்லாம் கொழும்பு மாநகர் ஐ.தே.க.வுக்கு பலம் சேர்த்தது.

ராஜபக்சாக்களால் அசைக்க முடியவில்லை

2009 உள்நாட்டு வெற்றியின் பின்னர் நாடு முழுவதும் மஹிந்த புயல் ஓங்கியிருந்தபோது, அதன் தாக்கம் கொழும்பில் கொஞ்சம் கூட இருக்கவில்லை. அந்தப் புயலை ஐக்கிய தேசியக் கட்சி தனித்து எதிர்த்து வந்தது. எனினும், 2019 இற்குப் பிறகு ஐக்கிய தேசியக் கட்சிக்குள் ஏற்பட்ட உள்ளக முரண்பாடு மற்றும் பிளவு என்பதால் கொழும்பு மாநகரில் ஒரு பின்னடைவு ஏற்பட்டது.

எனினும், 2019 ஜனாதிபதித் தேர்தல், 2020 பொதுத் தேர்தல், 2024 ஜனாதிபதித் தேர்தல் என்பவற்றில் ஐக்கிய தேசியக் கட்சியிலிருந்து பிரிந்து புதிய கட்சியாக உருவான ஐக்கிய மக்கள் சக்தி கொழும்பு மாநகரில் ஆதிக்கத்தைத் தக்க வைத்துக்கொண்டது.

அசைத்துப் பார்த்தது தே.ம.ச.

ஆனால், 2024 ஜனாதிபதித் தேர்தலைத் தொடர்ந்து நாட்டில் அநுர அலை வீசியதால் 2024 பாராளுமன்றப் பொதுத் தேர்தலில் மத்திய கொழும்பு, வட கொழும்பு மற்றும் கொழும்பு மேற்கு உட்பட அனைத்து தொகுதிகளும் தேசிய மக்கள் சக்தி வசமானது. இந்த உள்ளூராட்சி மன்றத் தேர்தலில் மத்திய கொழும்பில் மாத்திரம் ஐக்கிய மக்கள் சக்தி குறிப்பிட்ட அளவு ஆதிக்கத்தை செலுத்தினாலும், கொழும்பு மேற்கு, கொழும்பு வடக்கு, பொரளை, கொழும்பு கிழக்கு என்பவற்றில் தேசிய மக்கள் சக்தியே ஆதிக்கத்தை நிலைநிறுத்தியது.

தடம்பதித்த தே.ம.ச.