துஷித்த ஹல்லொலுவவின் ஜீப் மீதான துப்பாக்கிச் சூடு உதவி புரிந்த மூவர் கைது

நாரஹேன்பிட்டி, சுற்றுவட்டப் பாதையில் பிரபல தனியார் வைத்தியசாலைக்கு அருகே வைத்து, தேசிய லொத்தர் சபையின் முன்னாள் நடவடிக்கை பணிப்பாளரும் முன்னாள் ஜனாதிபதி ரணில் விக்ரமசிங்கவின் பொது மக்கள் தொடர்பாடல் பணிப்பாளராகவும் கடமையாற்றிய துஷித்த ஹல்லொலுவ பயணித்த ஜீப்பை இலக்குவைத்து நடாத்தப்பட்ட துப்பாக்கிச் சூடு குறித்த விசாரணையில் பல்வேறு விடயங்கள் வெளிப்படுத்தப்பட்டுள்ளன.

- எம்.எப்.எம்.பஸீர்

கொழும்பு குற்றத் தடுப்புப் பணிப்பாளர் பிரிவின் சிரேஷ்ட பொலிஸ் அத்தியட்சர் இந்திக லொக்குஹெட்டியின் கீழ் முன்னெடுக்கப்படும் சிறப்பு விசாரணைகளுக்கு அமைய இந்த விடயங்கள் வெளிப்படுத்தப்பட்டுள்ள நிலையில், பிரதான சந்தேக நபரையும் பொலிஸார் நெருங்கியுள்ளனர்.

இவ்வாறான நிலையில் குறித்த சம்பவத்தில் உதவி ஒத்தாசை புரிந்தமை தொடர்பில் பெண் ஒருவர் உள்ளிட்ட மூன்று சந்தேக நபர்களை கொழும்பு குற்றத் தடுப்புப் பிரிவினர் கைது செய்ததாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சர் புத்திக மனதுங்க தெரிவித்தார்.