హాస్యానికి చిరునామా..

విజయనగర సామ్రాజ్య రాజు శ్రీకృష్ణదేవరాయల ఆస్థానంలోని అష్టదిగ్గజ కవులలో ఒకరిగా ప్రసిద్ధి తెలుగు పండితుడు, సలహాదారు తెనాలి రామకృష్ణుడు.

- - షేక్ అబ్దుల్ హకీం జాని

విజయనగర సామ్రాజ్య రాజు శ్రీకృష్ణదేవరాయల ఆస్థానంలోని అష్టదిగ్గజ కవులలో ఒకరిగా ప్రసిద్ధి తెలుగు పండితుడు, సలహాదారు తెనాలి రామకృష్ణుడు. ఈయనను తెనాలి రామలింగడు అని కూడా పిలిచేవారు. స్మార్త శాఖకు చెందిన నియోగి బ్రాహ్మణ కుటుంబంలో జన్మించిన రామకృష్ణుడు, తన పదునైన హాస్యం, తెలివితేటలు, కవితా నైపుణ్యంతో 'వికటకవి' (హాస్య కవి) అనే బిరుదును పొందారు. మొదట గార్లపాటి రామకృష్ణుడిగా ఉన్న అతను తెనాలి వచ్చినందున తెనాలి రామకృష్ణుడిగా ప్రసిద్ధి చెందారు. తెనాలిలో రామకృష్ణకవి మేనమామలు ఉండేవారు.

జీవిత విశేషాలు

తెనాలి రామకృష్ణని పేరు వినగానే హాస్య కథలు గుర్తుకు వస్తాయి. ఎవరీ తెనాలి రామకృష్ణుడు? తెనాలి ఎక్కడ ఉంది? అని మూలాల్లోకి వెళితే ఎన్నో విషయాలు మనకు తెలుస్తాయి. తెనాలి గుంటూరు జిల్లాలో ఉంది. తెనాలి రామకృష్ణడికి తల్లిదండ్రులు పెట్టిన పేరు రామలింగస్వామి.గార్లపాటి రామన్నమంత్రి, లక్ష ్మమాంబ దంపతులకు 1480 సెప్టెంబర్ 22 రామలింగస్వామి జన్మించారు.రామలింగడి తండ్రి రామన్నమంత్రి రామలింగేశ్వరస్వామి దేవాలయంలో ప్రధాన అర్చకుడిగా పనిచేసేవాడు.తెనాలిలోని రామేశ్వరాలయంలోనే రామకృష్ణునికి రామలింగస్వామి అని నామకరణం చేశారు. ఈ దంపతులకు ముగ్గురు సంతానంలో పెద్దవాడు రామలింగడు. కాగా రెండవ వాడి పేరు అన్నయ్య. మూడవవాడి పేరు వరరాఘవకవి. రామలింగస్వామి ముత్తాత, తాత, తండ్రి అందరూ గుంటూరు జిల్లా సత్తెనపల్లి మండలంలోని లక్కరాజుగార్లపాడు గ్రామానికి చెందినవారు. వీరి ఇంటి పేరు గార్లపాటి రామలింగస్వామి.పూర్వీకులు నివసించిన గార్లపాడును లక్కరాజు అనే వ్యక్తి స్థాపించడంతో దానికి లక్కరాజుగార్లపాడు అనే పేరు వచ్చింది. వారు గార్లపాడులో వివసించిన ఇంటి ప్రదేశంలో ప్రస్తుతం గ్రామస్థులు గుర్తుగా బొడ్రాయిని ఏర్పాటు చేశారు.రామలింగకవి తాత అప్పన్న కవి సుదక్షిణా పరిణయం అనే గ్రంథాన్ని రాశాడు.