సమస్యలను తొలగించె సుబ్బరాయుడు

యా వత్ భారతదేశంలో తమిళనాడుతో పోలిస్తే మిగిలిన రాష్ట్రాలలో ఆది దంపతుల ద్వితీయ పుత్రుడు దేవసేనాని అయిన శ్రీ సుబ్రహ్మణ్య స్వామి ఆరాధన తక్కువ అనే చెప్పుకోవాలి.

- ఇలపావులూరి వెంకటేశ్వర్లు

యా వత్ భారతదేశంలో తమిళనాడుతో పోలిస్తే మిగిలిన రాష్ట్రాలలో ఆది దంపతుల ద్వితీయ పుత్రుడు దేవసేనాని అయిన శ్రీ సుబ్రహ్మణ్య స్వామి ఆరాధన తక్కువ అనే చెప్పుకోవాలి. తమిళనాడులో శ్రీ కుమారస్వామి కొలువైన ప్రముఖ క్షేత్రాలైన ఆరు పాడై వీడుతో సహా అనే ఆలయాలు ప్రతి ఒక్క జిల్లాలో కనపడతాయి. అంతేకాదు.. ప్రతి ఒక్క శైవ క్షేత్రంలో తప్పనిసరిగా ఒక్కటయినా శ్రీ వల్లీదేవసేన సమేత శ్రీ సుబ్రహ్మణ్య సన్నిధి కనపడుతుంది. సంగమ కాల సాహిత్యంలో కూడా శ్రీ కార్తికేయ ప్రస్తావన అనేక చోట్ల కనపడుతుంది. ప్రముఖ కవి అరుణగిరినాథర్ తన ఆరాధ్య దైవం అయిన శ్రీ షణ్ముఖుని కీర్తిస్తూ అనేక వేల కీర్తనలు రచించి గానం చేశారు అని తెలుస్తోంది.

శ్రీ కార్తికేయ, శ్రీ షణ్ముఖ, శ్రీ ఆర్ముగ, శ్రీ ఆండవర్, శ్రీ దండాయుధపాణి, శ్రీ వేలాయుధం, శ్రీ స్కంద, శ్రీ మురుగన్.. ఇలా ఎన్నో పేర్లతో తమ ఆరాధ్య దైవాన్నికొలుచుకొంటారు. తమ పిల్లలకు ఆ పేర్లను పెట్టి ప్రేమతో పిలుచుకొంటారు. వారికి దేవసేనాని పట్ల ఇంతటి గౌరవాభిమానాలు ఉండటానికి కారణం ఆయన ఆదేశం మేరకే అగస్త్య మహర్షి పొదిగై పర్వతాలలో ఉంది. దేవ భాష సంస్కృతంతో పాటు తమిళ భాష రూపొందించారన్న నమ్మకమే. అంతేకాకుండా శ్రీ షణ్ముఖుడు జ్ఞాన ప్రదాన అన్న విశ్వాసం కూడా ప్రధానమైనది.తమిళనాడు అంత కాకున్నా దక్షిణాదిలో కర్ణాటక రాష్ట్రంలో కూడా విశేష శ్రీ సుబ్రహ్మణ్య స్వామి ఆలయాలు కనపడతాయి. శ్రీ కుక్కె సుబ్రహ్మణ్య స్వామి ఆలయం వాటిలో అగ్ర స్థానంలో ఉంది.

కేరళలో మహేశ్వరుడు, వైకుంఠవాసుడు, శ్రీ భగవతి అమ్మవారి తరువాత శ్రీ ధర్మశాస్త  అధిక ప్రాధాన్యం కలిగిన దైవం. చాలా కొద్ది చోట్ల శ్రీ సుబ్రహ్మణ్య క్షేత్రాలు కనపడతాయి.

ఇక మన రాష్ట్రంలో రాహు-కేతు పరిహార పూజలు, సర్ప దోషాల నివారణార్ధం, కుజ .దోషం తొలగిపోవడానికి, కల్యాణం కోసం, సంతానం కోవడానికి.. ఇలా సుబ్రహ్మణ్య స్వామి ఆరాధన జరుగుతుంటుంది.