தமிழரசுக் கட்சியின் புதிய தலைவர் தனது பதிலியை சமர்ப்பிக்க நீதிமன்றம் உத்தரவு

தமிழரசு கட்சியின் புதிய தலைவர் எதிர்வரும் வழக்குத் திகதியில் தனது பதிலியை சமர்ப்பிக்க வேண்டும் என நீதிமன்றால் இன்று (04) உத்தரவிடப்பட்டுள்ளதாக ஜனாதிபதி சட்டத்தரணியும் குறித்த வழக்கின் எதிராளியுமான எம்.ஏ.சுமந்திரன் தெரிவித்தார்.

- கிளிவெட்டி நிருபர்

தமிழரசுக் கட்சியின் வழக்கானது திருகோணமலை மாவட்ட நீதிமன்றில் இடம்பெற்று வருகின்ற நிலையில் குறித்த வழக்கானது நேற்று புதன்கிழமை விசாரணைக்காக எடுத்துக்கொள்ளப்பட்டபோதே நீதிபதி இந்த உத்தரவை பிறப்பித்தார்.

நேற்றைய வழக்கு விசாரணை தொடர்பில் சுமந்திரன் மேலும் தெரிவிக்கையில், தமிழரசுக் கட்சியின் தலைவராக இருந்த மாவை சேனாதிராஜாவின் மறைவுக்குப் பின்னர் அவருக்குப் பதிலாக புதிய தலைவர் நியமிக்கப்பட்டுள்ளதால் அவரை இந்த வழக்கிலே முதலாவது எதிராளியாக பதிலீடு செய்வதற்காகவே இன்றையதினம் (நேற்று) வழக்கு அழைக்கப்பட்டிருந்தது. அதற்கான ஆவணங்களை வழக்காளி, மன்றிலே சமர்ப்பித்திருக்கின்றார்.