பாமகவில் தந்தை - மகன் மோதல் பாஜக - அதிமுக ‘சமரச’ முயற்சி

பட்டாளி மக்கள் கட்சியில் (பாமக) நீண்டகாலமாக நிலவி வந்த உள் கட்சிப் பிரச்சனைகள் இப்போது வெட்ட வெளிச்சத்திற்கு வந்துள்ளன.

- 

கடந்த டிசம்பர் மாதம் நடந்த சிறப்பு புத்தாண்டு பொதுக்குழு கூட்டத்தில், தனது மகள்வழிப் பேரன் முகுந்தனை இளைஞரணித் தலைவராக, கட்சியின் நிறுவனர் ராமதாஸ் அறிவித்தபோது, கட்சித் தலைவரான அன்புமணி மேடையிலேயே வெளிப்படையாக அதனை ஏற்க மறுத்தார்.

தந்தை-மகனுக்கு இடையிலான மோதல் முதல்முறையாக வெளிச்சத்திற்கு வந்தது. ஆனால், அந்த மாதத்திலேயே இருவரும் சந்தித்து சமரசமாகி விட்டார்கள் எனக் கூறப்பட்டது. ஆனால் அது நிரந்தரமாகவில்லை.

கடந்த ஏப்ரல் 11 அன்று, அன்புமணியை கட்சித் தலைவர் பதவியில் இருந்து நீக்குவதாக ராமதாஸ் அறிவித்தார். தலைவர் பதவியையும் தானே வகிக்கப் போவதாக அறிவித்தார்.

பகிரங்க மோதலின் தீவிரம்

அதைத்தொடர்ந்து, மே 10 அன்று நடந்த சித்திரை முழு நிலவு மாநாட்டின் ஏற்பாடுகளை முழுவதுமாக அன்புமணி செய்தபோதும், மேடையில் தந்தை -மகன் ஆகிய இருவரும் நேருக்கு நேர், முகம் கூட பார்த்துக் கொள்ளவில்லை. மாறாக அன்புமணியை சாடையாக ராமதாஸ் விமர்சித்தார். இந்த சம்பவம் கட்சிக்குள் நிலவும் பிளவின் ஆழத்தை உணர்த்தியது.

அத்துடன் இல்லாமல், மே 29 அன்று செய்தியாளர் சந்திப்பை நடத்திய ராமதாஸ், “வளர்த்த கிடா மார்பில் எட்டி உதைத்தது” என்று அன்புமணியைக் கடுமையாகச் சாடினார். அன்புமணியை எம்.பி., அமைச்சர் பதவியில் அமர்த்தியிருக்கக் கூடாது” என்றார்.