உள்ளூர் தமிழ் இலக்கியத்தை ஆராய்ந்த கருத்தரங்கு

சிந்தனையாளர்கள் பலரின் படைப்பாற்றலுக்கு வித்திட்டு வரும் சிங்கப்பூர்த் தமிழ் இலக்கியத்தைக் கொண்டாடும் வகையில் '60 ஆண்டுகாலச் சிங்கப்பூர்த் தமிழ் இலக்கியம்' என்ற தலைப்பில் முழு நாள் கருத்தரங்கு ஒன்று நடைபெற்றுள்ளது.

- விஷ்ருதா நந்தகுமார்

கடந்த 60 ஆண்டு காலத்தில் சிங்கப்பூர்த் தமிழ் இலக்கியத்தின் சிறப்பையும் வளர்ச்சியையும் மையப்படுத்தி இந்தக் கருத்தரங்கு செப்டம்பர் 7ஆம் தேதி தேசிய நூலகத்தில் நடைபெற்றது.

சிங்கப்பூர்த் தமிழ் எழுத்தாளர் கழகம் தேசிய நூலக வாரியத்தின் ஆதரவோடு ஏற்பாடு செய்த இந்தக் கருத்தரங்கின் இறுதியில், 60 சிறுகதைகள் அடங்கிய 'SG60 சிங்கையின் மணிவிழாச் சிறுகதைகள்', 60 கட்டுரைகள் அடங்கிய 'SG60 சிங்கையின் மணிவிழாக் கட்டுரைகள்' என இரு நூல்கள் முன்னாள் நாடாளுமன்ற நியமன உறுப்பினர் இரா. தினகரன் சிறப்பு விருந்தினராகக் கலந்துகொண்டு நூல்களை வெளியிட்டார்.

“நாட்டின் சமுதாய ஆவணமாகக் காப்பாற்றப்படும் இலக்கியம், ஒரு தனிமனிதனையும் சமூகத்தையும் இணைக்கும் கருவியாக விளங்குகிறது,” என்றார் நிகழ்ச்சியில் வரவேற்புரை ஆற்றிய சிங்கப்பூர்த் தமிழ் எழுத்தாளர் கழகத் தலைவர் சு.முத்துமாணிக்கம்.