அனைவரையும் உள்ளடக்கும் ஆகப் பெரிய உள்ளூர் கலை விழா

அனைவரையும் உள்ளடக்கும் சிங்கப்பூரின் ஆகப் பெரிய கலை விழாவான 'ஷேப்பிங் ஹார்ட்ஸ் (Shaping Hearts) 2025' இன் அதிகாரபூர்வ தொடக்க விழா நேற்று (செப்டம்பர் 13) நடைபெற்றது.

- ஷர்வேஸ்வரி சரவணன்

சிறப்புத் தேவையுடையோரைக் கொண்ட சமூகத்தின் கலைத் திறனைக் கொண்டாடவும் அனைவரையும் உள்ளடக்கவும் அந்த வருடாந்தரக் கலை விழா வகைசெய்கிறது.

'எல்லைகளுக்கு அப்பால்' என்ற கருப்பொருளில் நிகழ்ச்சிக்கு ஏற்பாடு செய்தது வடகிழக்குச் சமூக மேம்பாட்டு மன்றம்.

'நமது தெம்பனிஸ்' நடுவத்தின் 'ஃபெஸ்டிவ் பிளாசா'வில் நடைபெற்ற நிகழ்ச்சியில் பிரதமர் அலுவலக அமைச்சரும் நிதி, தேசிய வளர்ச்சி இரண்டாம் அமைச்சருமான இந்திராணி ராஜா சிறப்பு விருந்தினராகக் கலந்துகொண்டார்.

அவருடன் வடகிழக்குச் சமூக மேம்பாட்டு மன்ற மேயர் பே யாம் கெங், சமுதாய, குடும்ப மேம்பாட்டு அமைச்சர் மசகோஸ் ஸூல்கிஃப்லி, சுகாதார, மனித வள மூத்த துணையமைச்சர் கோ போ கூன் ஆகியோரும் நிகழ்ச்சிக்கு வந்திருந்தனர்.