கோடம்பாக்கத்து வம்புகள், வழக்குகள்

வம்பு, தும்பு, வழக்கு, பிணக்குகளால் பரபரத்தபடி இருக்கிறது கோடம்பாக்கம்.

- 

அண்மையில் ‘வேட்டுவம்' படப்பிடிப்பின்போது, சண்டைக்காட்சி படமாக்கப்பட்டபோது, கார் பல்டிகாட்சியில் நடித்த சண்டைக்கலைஞர் மோகன்ராஜ் இறந்துபோனார்.

இதையொட்டி, சில நாட்களுக்கு முன் சண்டைப்பயிற்சியாளர் ‘ஸ்டண்ட்' சில்வா ஒரு விஷயத்தைப் பகிர்ந்தார்.

“கடந்த ஏழெட்டு ஆண்டுகளாக ஸ்டண்ட் கலைஞர்களுக்கு காப்புறுதி (இன்ஷூரன்ஸ்) வசதி செய்து கொடுத்து வருகிறார் சூர்யா. இதற்காக ஆண்டுக்கு பத்து லட்ச ரூபாய் வரை அவர் செலவிடுகிறார்,” எனக் குறிப்பிட்டிருந்தார் சில்வா.

ஆனால், பாலிவுட் நாயகன் அக்ஷய் குமார் 650 சண்டைக்கலைஞர்களுக்கு காப்புறுதி எடுத்துக்கொடுத்துள்ளார்.

இதைப் பாராட்டி, “இங்குள்ள நடிகர்களுக்கு ஏன் இப்படித் தோன்றவில்லை, வாழ்த்துகள் அக்ஷய் சார்,” எனப் பாராட்டியிருந்தார் இயக்குநர் மோகன்.ஜி. (‘பழைய வண்ணாரப்பேட்டை', ‘திரௌபதி', ‘பகாசூரன்' படங்களை இயக்கியவர்.)

இதையடுத்து, ஸ்டண்ட் மாஸ்டர் சில்வா, சூர்யா பற்றிக் கூறியதை மோகன்.ஜிக்கு அனுப்பிவைத்தனர் சூர்யாவின் ரசிகர்கள். இருதரப்புக்கும் இடையே மோதல் நீடித்து வருகிறது.

நயன்தாராவுக்கு சிக்கல் மேல் சிக்கலாக வழக்குகள் வந்து கொண்டிருக்கின்றன.

நயன்தாரா, விக்னேஷ் சிவன் திருமண ஆவணப்படம் கடந்த 2024 நவம்பரில் ‘நயன்தாரா: தேவதைக்கு அப்பால்' என்ற பெயரில் ஒளிபரப்பாகி, தொடர்ந்து ஒளிபரப்பும் செய்யப்பட்டு வருகிறது.

இதில் தனுஷ் தயாரித்து, விக்னேஷ் சிவன் இயக்கி, நயன்தாரா நடித்த படத்தின் சில காட்சிகள் இணைக்கப்பட்டுள்ளன.