பின்லாந்து நாட்டின் கல்விமுறைமையும் இலங்கை பெற்றுக்கொள்ள கூடிய முன்மாதிரிகள்

பிள்ளைகள் பாடசாலையிலும் வீடுகளிலும் தனியார் கல்வி நிறுவனங்களிலும் ஓய்வு ஒழிச்சலின்றி கல்விச் செயன்முறைகளிலே ஈடுபடுகின்றனர்.

- சிவசாமி மனோகரன், ஓய்வு நிலை சிரேஷ்ட விரிவுரையாளர், தேசிய கல்வியியற் கல்லூரி.

போட்டித்தன்மையின் காரணமாக சுயநலப் போக்கும் ஏனையோருக்கு உதவுகின்ற மனப்பான்மை இன்மையும் மேலோங்கியுள்ளன. எனவே, பின்லாந்து கல்வி முறையிலே காணப்படுகின்ற சுதந்திரமான மற்றும் சுயாதீனமான நிலைமைகளையும் சுயவேகக் கற்றல் சந்தர்ப்பங்களையும் முன்மாதிரிகளாகக் கொண்டு கற்றல் கற்பித்தல் செயன்முறைகளை மாற்றியமைப்பதன் ஊடாக கல்விமுறைமையிலே விருத்திகளை எதிர்பார்க்கலாம்.

பின்லாந்தின் பாடசாலை முறைமையின் முக்கிய அம்சங்களை நோக்குவோமானால் இங்கு அனைத்து பாடசாலைகளும் 100% அரசாங்கத்தின் கீழ் இயங்குகின்றன் எந்தவொரு தனியார் பாடசாலைகளும் அங்கு இல்லை. கல்வி முற்றுமுழுதாக இலவசமாக அரசாங்கத்தால் வழங்கப்படுகிறது. பின்லாந்து பாடசாலைகளில் பரீட்சைகள் நடத்தப்படுவதில்லை. மாணவர்களை தரவரிசை அடிப்படையில் வேறுபடுத்துவது இல்லை. மாணவர்களது 13 வயது வரை எந்தப் பொதுப் பரீட்சைகளும் நடத்தப்படுவதில்லை. உயர்தரப் பரீட்சையின் இறுதியில் மட்டுமே விரும்பியோர் இறுதிப்பரீட்சை எழுதலாம். பிள்ளைகள் 7 வயதிலேயே பாடசாலையில் அனுமதிக்கப்படுகின்றனர். இதன் பின் முதல் மூன்று ஆண்டுகளில் கற்றலுக்கு அப்பால் விளையாட்டு, உளவியல் மற்றும் உடல் வளர்ச்சிக்கு அதிக நேரம் ஒதுக்கப்பட்டுள்ளது. ஒரு பாடசாலையில் அதிக பட்சமாக 600 மாணவர்களே அனுமதிக்கப்படுகின்றனர். ஒரு வகுப்பறையில் 20-26 வரையான மாணவர்களே இருக்கின்றனர். வீட்டுப் பாடம் எதுவும் வழங்கப்படுவதில்லை. மாணவர்கள் தத்தமது விருப்பத்துக்கு ஏற்ப பாடங்களைக் கற்றுக் கொண்டால் போதுமானதாகக் கருதப்படுகிறது. 7 வயது தொடக்கம் 16 வயது வரை ஆரம்பக் கல்வி மற்றும் கனிஷ்ட இடைநிலைக் கல்வி கட்டாயமானதாக்கப்பட்டுள்ளது. இது முற்றுமுழுதாக இலவசமாக வழங்கப்படுகிறது. 10 வருட கட்டாயக் கல்வியின் பின்னர் மாணவர்கள் தமது விருப்பத்துக்கு ஏற்றவாறு தொழில் மற்றும் மேலதிக கல்வித் துறைகளைத் தெரிவு செய்து கொள்கின்றனர்.