‘கலை உலகின் கலைக் களஞ்சியம்‘

எனக்கொரு நம்பிக்கை. அது வாசிப்பினூடாக பெற்றுக்கொண்ட அனுபவம். ஒரு படைப்பாளி வாசகனை தன்னுடைய எழுத்துக்களுக்கப்பால் அவன் உணர்வுகளை எடுத்துச்செல்வாரேயானால் அப்படைப்பு சமூகத்தை வழி நடத்துவது மட்டுமின்றி, காலத்தால் என்றும் நிலைத்திருக்கும்.

- எஸ்.நயனகணேசன்

வாழ்க்கையை இலக்கியங்களிலிருந்தே கற்கலாம் என்ற உண்மைக்கு மனிதர்களின் சுயசரிதங்களும் சான்று பகர்கின்றன.

அந்த வகையில், அண்மையில் நான் படித்த வானலைகளில் ஒரு வழிப்போக்கன் என்ற சுயசரிதம் வாசகனின் தன்னம்பிக்கையற்ற கருதுகோள்களை தகர்ப்பதுடன் புத்துணர்ச்சி மிக்க சிந்தனைகளுக்கும், நாவடக்கம் மற்றும் அவையடக்கம் என்ற மகத்துவங்களுக்கும் புடம் போடுவதுடன் உணர்த்தவும் செய்கின்றது.

தமிழுலகின் நட்சத்திர அறிவிப்பாளர், சிம்மக்குரலோன் பி.எச்.அப்துல் ஹமீதின் வாழ்வனுபவக் குறிப்புக்கள் அனவைராலும் கற்கத்தக்கது. கற்ற பின் அதற்குத் தக நிற்கத் தக்க சுயசரிதமும் கூட.

ஒருவரின் விடாமுயற்சியும் தூய்மையான சிந்தனையும் வெற்றியைப் பெற்றுத்தரும் என்ற இயற்கை விதி காந்தக்குரலோன் ஹமீதின் வாழ்க்கை பாடங்களிலிருந்தும் கற்றுக்கொள்ளலாம்.

ஒவ்வொரு ஊடகவியலாளனும் மாத்திரமன்றி, ஒவ்வொரு தனி மனிதரும் கற்றறிய வேண்டிய பல அரியத்தகவல்களுடனும் அறிவியலுடனும் படைப்பாக்கப்பட்டுள்ளது வானலைகளில் ஒரு வழிப்போக்கன்.

ஒரு மனிதன் தன்னை தன் அகக் கண்களால் பார்க்கச் செய்யும் எழுத்துக்கள் எவ்வளவு வலிமை வாய்ந்ததென உணர்வதும் ஒரு கொடைதான். அதனை இப்புத்தகம் செவ்வனே நிறைவேற்றியுள்ளது.

அந்த வகையில், ஒரு படைப்பாளனின் உண்மையான அனுபவப் பகிர்வு திறந்த புத்தகமாய் அனைவராலும் படிக்கப்படச் செய்வதென்பது போற்றுதற்குரியது. ஒருவரின் அனுபவம் மற்றொருவரை செப்பனிடும் என்பதற்கு வானலைகளில் ஒரு வழிப்போக்கன் தக்கன பிழைத்தல்.

இலங்கை வானொலி வரலாற்றில் மட்டுமல்ல உலக வானொலி வரலாற்றிலும் தனக்கென முத்திரைப் பதித்துக்கொண்ட அன்பு அறிவிப்பாளர் ஹமீத் கடந்து வந்த அரைநூற்றாண்டு அனுபவ பாதை எதிர்கால சந்ததியினருக்கு சிறந்த உசாத்துணை.