பரீட்சையின்போது ஏற்படும் உள நெருக்கீட்டினை சமாளித்தல்

“உள நெருக்கீடு என்பது ஒரு செயன்முறையாகும்" பரீட்சையின் போது, ஏற்படும் உள நெருக்கீட்டினை தாமாகவே சரிசெய்து கொள்கின்ற தயார்ப்படுத்தலாகும். சில நெருக்கீடுகள் வாழ்க்கையில் பயன்தரக்கூடியதாக அமையும் அதேவேளை, அளவுக்கு அதிகமான உளநெருக்கீடுகள் ஆபத்தானவையாக அமையலாம்.

- சனா பராஹ் ஹபீப், (ஆசிரியர்), உளவளத்துணை மாணவி, NISD (Jaffna)

பரீட்சையொன்றினை வெற்றிகொள்ள பரீட்சார்த்தியொருவர் எவ்வாறு தனக்கு ஏற்படும் உளநெருக்கீட்டினை மட்டுப்படுத்தலாம். பரீட்சையொன்றினை வெற்றிகொள்ள பரீட்சார்த்தியொருவர் எவ்வாறு தனக்கு ஏற்படும் உள நெருக்கீட்டினை மட்டுப்படுத்தலாம்? பரீட்சையொன்றைச் சிறப்பாக வெற்றி கொள்வதற்கு பரீட்சாத்தியொருவர் திறம்படச் செயற்பட்டு சிறந்த அடைவு மட்டத்தை எய்துவதன் ஊடாக சமூகத்தில் புகழையீட்டலாம்.

அளவுக்கதிகமான நெருக்கீடோ அல்லது கணிசமான அளவு நெருக்கீடோ பரீட்சார்த்தியொருவரின் வினைத்திறன், செயற்றிறன் என்பவற்றில் பாதிப்பை ஏற்படுத்தக்கூடும். எனவே பரீட்சார்த்தியொருவர் நடுநிலையானவராக இருக்க வேண்டுமென்பதே இதன் அர்த்தமாகும். உங்கள் பரீட்சையைச் சிறப்பாக வெற்றிகொள்வதற்கும், நெருக்கீடுகளை குறைத்துக் கொள்வதற்குமான சில ஆலோசனைகள்,

நெருக்கீடுகளைச் சமாளிப்பதற்கான உத்திகள்

உத்தி-01: உதவி நாடல் பரீட்சைக்குத் தயாராகும்போது, ஆசிரியரிடமோ, அல்லது விரிவுரையாளரிடமோ, பாடங்களை எவ்வாறு மீட்டிக் கொள்ளலாம் என்பது பற்றி கேட்டறிந்து கொள்ளுங்கள்.

உத்தி-02: குறுகிய கால ஓய்வெடுத்தல் நீங்கள் பரீட்சைக்குத் தயாராகும்போது, அல்லது மீட்டல் செய்யும்போது, சோர்வடைந்தால் சற்று நேரம் ஓய்வெடுத்துக் கொள்ளுங்கள். களைப்படையும்போது, மனப்பதிவுகளை ஏற்படுத்த முடியாது. 10 நிமிடம் போதுமானது.

உத்தி-03: வேலைத்திட்டம். மீட்டும்போது, நீங்கள் அறிந்த விடயங்களை திறம்பட மீட்டிக் கொள்ளவும்.

உத்தி - 04: ஆரோக்கியம் போதியளவு தூக்கம், உணவும் ஆன்மீகப் பயிற்சி தேவையான உடற்பயிற்சியிலும் ஈடுபட்டு உற்சாகமாகச் செயற்பட வேண்டும். குறிக்கோளுடன் தொடர்புபடாத எந்த விடயங்களையும் கவனத்தில் எடுக்காதிருப்பது பயன்தரும்.

உத்தி - 05: நீங்கள் உங்கள் எதிர்காலம் பற்றியோ, தோல்விகள் பற்றியோ யோசிக்க வேண்டாம். மேலும், உங்களை வேறு யாருடனும் ஒப்பிட்டுப் பார்க்க வேண்டாம். இவை சில வேளைகளில் தைரியத்தை இழக்கச் செய்யும்.