பெண் கல்வி சமூக முன்னேற்றத்தின் துருவ நட்சத்திரம்

“ஊது குழலைக் கையில் எடுக்கும் பெண்கள் எழுதுகோலைக் கையில் எடுக்கவேண்டும்" என்ற பாரதியாரின் கவிவரியானது பெண்களைக் கல்விப் பாதையை நோக்கி வலுப்படுத்துவதாக அமைந்துள்ளது. சமையலறையில் ஊதுகுழலைக் கையில் எடுக்கும் ஒரு பெண் எழுதுகோலை கையில் எடுத்தால் முழு சமுதாயமும் பெண் வசப்படும் அவ்வளவு பெருமை உடையவள் பெண்.

- நிசன்குமார் கோபிநாத், முதலாம் வருடம், கலைப்பீடம், யாழ். பல்கலைக்கழகம்.

மனித இனத்தில் பெண்ணியம் மற்றும் பெண்ணுரிமை போன்ற சொற்கள் வயது வேறுபாடுகளைக் கடந்து எல்லா பெண்களையும் குறித்து நிற்கின்றது.

உலகில் பெண் தலைமைத்துவமே பெருமையுடையதும் சிறப்புடையதும் கூட. ஆரம்பக் காலத்தில் பெண்கள் ஆண் வர்க்கத்தினரால் வழிநடத்தப்பட்டார்கள். அவர்களின் உரிமைகள், நலன்கள், சுதந்திரம் என்பன மறுக்கப்பட்டன. அத்துடன், சிறகற்ற பறவையைப்போல அடையாளப்படுத்தபடுத்தப்பட்டார்கள். சமய நம்பிக்கைகள், மரபுகள் வழக்காறுகள் என்பன அவர்களுக்குப் புறம்பாகவே இருந்தன.

உண்மையிலேயே அவர்களின் ஆரம்பக்காலம் அடிமைக்காலம். நரக வேதனையை விடக் கொடுமையானது. நான்கு சுவரும், வீட்டுச்சூழலும், மதில்களுக்கும் உள்ளேயே உலகமாக இருந்த காலமும் உண்டு. ஆண் தலைமைத்துவம், சிறுவயது திருமணம், அடக்குமுறை என்பன அவர்களின் சுதந்திரத்தை நிர்மூலமாக்கியது.

பிற்பட்ட காலப்பகுதியில் அடிமை முறை சமூகம் ஒழிய வேண்டும் என குரல் கொடுத்தவர்கள் பலர். அதில் பாரதியார் முக்கியமானவர். அவர் பெண் விடுதலை பற்றிய கருத்தை சமூகத்திற்கு எடுத்துரைக்கக் கவிதை, கட்டுரை, பாடல்களையும் வடிவமைத்துள்ளமை குறிப்பிடத்தக்கது.

ஆரம்பக்காலத்தில் மாத்திரம் பெண்களுக்குச் சுதந்திரம் உறுதி செய்யப்பட்டிருந்தால் இச்சமயம் பல துறைகளில் சாதனை சிற்பிகளாக ஒழிப்பு கட்டி தனது சாதனையை உலகமெங்கும் சுடரொளியாய் பரப்பியிருப்பார்கள்.

இருந்தாலும், சமூகத்தில் சில ஆண்கள் பெண் சுதந்திரம் பற்றிச் சிந்திப்பது இல்லை. ஆண் ஒருவன் ஒரு பெண்ணின் சுதந்திரத்தை பறித்தான் என்றால், அது அவன் தன்தாயின் உயிரை பறிப்பதற்குச் சமமாகும். எல்லா ஆண்களும் எல்லா பெண்களையும் மேன்மையானவர்களாகக் கருதினால், பெண்களின் சுதந்திரம் இயல்பாகவே மேம்பாட்டடையும். இதை எவரும் கவனத்தில் கொள்வதில்லை. அவ்வாறான கருத்தை அவர்கள் தமக்குள் உருவாக்கினால் பெண்ணுரிமை மேம்படுமே தவிர அது நிர்மூலமாக்கப்படாது என்பது உறுதியான விடயமாகும்.