Rugby se toekoms vonkel in Riversdal

Die toekoms van Suid-Afrikaanse rugby is die afgelope naweek (2 tot 4 Oktober) met oorgawe ten toon gestel en wat 'n pragvertoning was dit nie.

- Hugo Redelinghuys

Vir drie dae is Hoër Landbouskool Oakdale se rugbyvelde in 'n bruisende arena van talent, trots en brute krag omskep toe van die land se beste o. 12-spelers mekaar die stryd aangesê het tydens die jaarlikse interprovinsiale rugbytoernooi.

Die interprovinsiale o. 12-toernooi by Oakdale wys dat Suid-Afrika se rugbytalent bruisend gesond is - met jong sterre wat reeds groot drome koester.

Meer as 30 wedstryde is oor die naweek gespeel en die gehalte van spel het elke toeskouer laat besef dat die land oorvloedig geseënd is met talent. Die jong spelers het gehardloop, aangeval en verdedig met die passie van seuns wat weet hulle dra nie net 'n nommer op hul rug nie, maar 'n droom op hul skouers.