શાતિર ગઠિયા વૃદ્ધને ટાર્ગેટ કર્યા બાદ પોલીસથી બચવા માટે રિક્ષાનાં રંગરૂપ બદલી નાખતા હતા

ક્રાઈમ બ્રાન્ચે શટલ રિક્ષામાં વૃદ્ધ પેસેન્જરને ટાર્ગેટ કરતી ટોળકી ઝડપી હતીઃ પોલીસ પણ ગઠિયાની મોડસ ઓપરેન્ડી જોઈને ચોંકી ઊઠી

- 

શટલ રિક્ષામાં પેસેન્જરના સ્વાંગમાં બેઠેલા ગઠિયા વિવિધ મોડસ ઓપરેન્ડીનો ઉપયોગ કરીને પેસેન્જ૨ના કીમતી સરસામાનની ચોરી કરીને ફરાર થઈ જાય છે. શહેર પોલીસના ચોપડે સંખ્યાબંધ ફરિયાદ શટલ રિક્ષા ગેંગ વિરુદ્ધ નોંધાય છે, જેમાં મોટા ભાગના કેસમાં ટેકનોલોજીના આધારે સફળતા મળી રહી છે. શટલ રિક્ષા ગેંગનો આંતક સંપૂર્ણ ખતમ કરવા માટે પોલીસ તેમજ એજન્સી સતત મહેનત કરી રહી છે અને જેમાં તેમને સફળતા પણ મળી રહી છે. અમદાવાદ ક્રાઈમ બ્રાંચની ટીમે થોડા દિવસ પહેલાં શટલ રિક્ષામાં સિનિયર સિટીઝનને ટાર્ગેટ કરીને ચોરી કરતી ગેંગનો પર્દાફાશ કર્યો હતો અને ત્રણ આરોપીને ઝડપી પાડ્યા હતા. ક્રાઈમ બ્રાંચ ત્રણેય ગઠિયાની મોડસ ઓપરેન્ડી જોઈને વિચારમાં પડી ગઈ હતી. આરોપી ચોરીની ઘટનાને અંજામ આપ્યા બાદ રિક્ષાની શકલ સુરત બદલી નાખતા હતા, જેથી તે પોલીસ સકંજામાં આવી શકે નહીં. જોકે ક્રાઈમ બ્રાંચની બાજનજરના કારણે આરોપીઓ હાલ જેલના સળિયા પાછળ ધકેલાઈ ગયા છે.