વિધાર્થી હત્યાકાંડઃ DEOના રિપોર્ટ બાદ ક્રાઈમ બ્રાંચ સ્કુલના સંચાલકો વિદ્ધ કાર્યવાહી કરશે

વાલીઓનાં નિવેદન-સ્કૂલ સંચાલકોના જવાબ સહિતના ડોક્યુમેન્ટ ક્રાઈમ બ્રાંચમાં જમા થશે

- 

સેવન્થ ડે સ્કૂલમાં વિદ્યાર્થીની હત્યા બાદ સંચાલકો વિરુદ્ધ કાયદાકીય સકંજો વધુ સખતાઈથી કસવા માટે ક્રાઈમ બ્રાંચ હવે જિલ્લા શિક્ષણાધિકારી (ડીઈઓ)ના રિપોર્ટની રાહ જોઈ રહી છે. ડીઈઓ ક્રાઈમ બ્રાંચમાં રિપોર્ટ આપશે. ત્યાર બાદ સ્કૂલના સંચાલકો વિરુદ્ધ કેટલીક કલમોનો ઉમેરો કરવામાં આવશે. તો બીજી તરફ કોર્ટની મંજૂરીની પણ ક્રાઈમ બ્રાંચ રાહ જોઈ રહી છે. ક્રાઈમ બ્રાંચે સ્કૂલના સંચાલકો વિરુદ્ધ જાણવા જોગ ફરિયાદ નોંધી હતી અને કોર્ટ પાસે ગુનો નોંધવાની મંજૂરી માગી હતી. ડીઈઓ સ્કૂલના સંચાલકો વિરુદ્ધ રિપોર્ટ આપશે તો તેમના વિરુદ્ધ ઝડપી કાર્યવાહી થઈ શકશે.

સેવન્થ ડે સ્કૂલમાં વિદ્યાર્થીની હત્યાના પગલે લોકોમાં ભભૂકી ઊઠેલો આક્રોશ શાંત પડી ગયો છે, પરંતુ સરકારી બાબુઓની કાર્યવાહી કરવાની રફતાર હજુ ઓછી નથી થઈ. સ્કૂલ સંચાલકો વિરુદ્ધ કાર્યવાહી કરવા માટે અમદાવાદ મ્યુનિસિપલ કોર્પોરેશન, ક્રાઈમ બ્રાંચ તેમજ શિક્ષણ વિભાગ એડીચોટીનું જોર લગાવી રહ્યાં છે. સેવન્થ ડે સ્કૂલના ધોરણ-૧૦માં અભ્યાસ કરતા વિદ્યાર્થીની ધોરણ-૮માં અભ્યાસ કરતા વિદ્યાર્થીએ ઘાતકી હત્યા કરી દીધી હતી. આ ઘટનાના પડઘા દિલ્હી સુધી • પડ્યા હતા અને લોકોમાં ઠેરઠેર આક્રોશ જોવા મળી રહ્યો હતો. માહોલ તંગ થાય નહીં તે માટે વિદ્યાર્થી હત્યા કેસની તપાસ પોલીસ કમિશનર જી.એસ. મલિકે ખોખરા પોલીસ પાસેથી આંચકી લઈ ક્રાઈમ બ્રાંચને સોંપી હતી.