வளர்ச்சி திட்ட பணிகளின் முன்னேற்றம் குறித்து ஆட்சியர் சிபி ஆதித்யா செந்தில்குமார் ஆய்வு

வேப்பூர் மற்றும் திட்டக்குடி வட்டங்களுக்கு உட்பட்ட பகுதியில் நெடுஞ்சாலைத் துறை, பால் வளத்துறை, ஊரக வளர்ச்சித் துறை, மருத்துவம் மற்றும் மக்கள் நல்வாழ்வுத்துறை, நீர்வளத்துறை ஆகிய துறைகளின் மூலம் மேற்கொள்ளப்பட்டு வரும் வளர்ச்சி திட்டப் பணிகள் குறித்து மாவட்ட ஆட்சித்தலைவர் சிபி ஆதித்யா செந்தில்குமார், பார்வையிட்டு ஆய்வு மேற்கொண்டார்.

- 

ஆய்வின்போது மாவட்ட ஆட்சித்தலைவர் தெரிவித்ததாவது, பெருகிவரும் வாகன போக்குவரத்தினால் ஏற்படும் சாலை விபத்துகளை தடுக்கும் பொருட்டும், சீரான பொது போக்குவரத்தினை ஏற்படுத்துவதன் அவசியம் கருதியும் தமிழக அரசால் கிராமப்புற சாலைகள் மற்றும் நெடுஞ்சாலைகளை விரிவுபடுத்துவது, மைய தடுப்பு அமைத்து ஒருவழி பாதையை இருவழி பாதையாக மாற்றுவது, சாலை வளைவுகளில் விபத்து ஏற்படாத வண்ணம் மேம்படுத்துவது, வேக கட்டுப்பாடு குறித்த எச்சரிக்கை பதாகைகள் அமைப்பது மற்றும் சாலையில் வேக கட்டுப்பாடு குறியீடுகள் மேற்கொள்வது உள்ளிட்ட பல்வேறு பணிகள் மூலம் விபத்தை குறைக்க நடவடிக்கை மேற்கொள்ளப்பட்டு வருகிறது.

அதன்படி விருதாச்சலம் வட்டத்திற்குட்பட்ட பகுதியில் விருத்தாச்சலம் புறவழிச் சாலையை இருவழிசாலையிலிருந்து நான்குவழிச் சாலையாக மேம்படுத்துவது, கூடுதல் உயர் மட்ட பாலம் அமைப்பது, சாலை மத்தியில் மையத் தடுப்பு அமைப்பது, சாலை பக்கவாட்டில் தடுப்புச் சுவர் அமைப்பது உள்ளிட்ட பணிகள் நடைபெறுவது குறித்து ஆய்வு செய்யப்பட்டது.