Minder skole: meer leerlinge?

Daar word baie gepraat oor leerlinge en wiskunde maar nie naastenby genoeg oor onderwysamptenare se berekeninge nie.

- 

Dr Jaco Deacon, uitvoerende hoof van die skoolbeheerliggaam-organisasie FEDSAS, verduidelik dat die regering se somme oor skole glad nie klop nie.

"Jannie kan 100 appels in twee mandjies dra. Hoeveel mandjies het Jannie nodig om 1 000 appels te dra? Een, as jy die onderwysstelsel se formule gebruik."

Die jongste beskikbare data oor die onderwyslandskap wys dat Suid-Afrika tans 22 259 openbare skole en 2 507 onafhanklike skole het. Dit is 122 minder skole as 'n jaar gelede, terwyl daar in dieselfde tydperk 54 454 meer kinders by die stelsel gevoeg is.

Van die nege provinsies is daar slegs een wat vanjaar meer skole het as die vorige jaar, naamlik die Wes-Kaap, met agt bykomende skole. Die provinsie se leerdertal het met 3 608 toegeneem, maar daar is 1 186 opvoeders minder as 'n jaar gelede om die 1 212 282 leerlinge te bedien. Oor 'n tienjaarperiode het die Wes-Kaap effektief slegs 17 skole bygekry.

Die mees verstommende verhaal speel egter in Gauteng af. Dié provinsie se leerdertal het die afgelope jaar met 10 867 gegroei, maar daar is vyf skole minder as 12 maande gelede. Daar is darem 277 onderwysers meer om die kinders te onderrig. Oor 'n tienjaarperiode is daar egter 17 skole minder om die 2 340 853 leerlinge te bedien.

Gauteng het reeds die grootste gemiddelde skoolgrootte in die land - bykans dubbel so groot as die gemiddelde skool elders. Dit is 'n aanklag teen elke LUR wat die afgelope twee termyne gedien het. Die provinsie het eenvoudig nie genoeg nuwe skole gebou om by bevolkingsgroei en migrasie by te hou nie.

Wat openbare skole betref, het die landskap die afgelope dekade dramaties verander. Meer as 592 000 leerlinge het by die stelsel aangesluit, maar daar is 1 646 minder openbare skole. Verstedeliking en migrasie na provinsies met beter werksgeleenthede is twee van die belangrikste dryfvere agter hierdie tendens.

ONAFHANKLIKE SKOLE SIEN DIE GAPING