Heyneke terug met groot drome en ambisie

Byna dertig jaar nadat 'n jong Heyneke Meyer sy afrigtingsloopbaan by die SWD Arende begin het, keer een van Suid-Afrika se grootste rugbybreine terug huis toe.

- Lizette da Silva

Die man wat die Bulle tot Superrugbyglorie en die Springbokke na wêreldhoogtes gelei het, is weer in die Suid-Kaap, waar alles vir hom begin het.

Meer as 'n nuwe werk

Meyer (58) se aanstelling as hoofafrigter van die Arende is meer as net 'n nuwe werk. Dis 'n "full-circle moment", en moontlik die begin van 'n nuwe era vir SWD-rugby.

George Herald het met Meyer, wat 'n twee jaar kontrak met die unie geteken het, gesels oor sy terugkeer na sy afrigtingswortels, sy visie vir die span en sy hernude verbintenis met die streek waar sy loopbaan begin het.

“Ek het destyds hierheen gekom as 'n jong afrigter met groot ambisies en drome,” vertel Meyer. “Die span was op daardie stadium in 'n moeilike plek, maar ek wou die beste afrigter wees wat ek kon wees. Ons het 'n paar swaar nederlae gely, selfs met 140 punte, maar ek wou trots terugbring. Toe ons later begin wen en 'n vol stadion trek, was dit ongelooflik. Daardie atmosfeer, die spanning, die gemeenskap se ondersteuning, dit bly by jou.”