PA maak reeds burgemees- terskandidaat bekend

Ofskoon die munisipale verkiesing eers in 2026 plaasvind, het die Patriotiese Alliansie (PA) in George Vrydag 6 Junie al aangekondig dat Fernando Fredericks sy burgemeesterskandidaat gaan wees.

- Eugene Gunning

Die PA hoop dat met die 36-jarige Fredericks hy daarin kan slaag om die mag in George oor te neem.

Op die oomblik swaai die DA met behulp van die ACDP die septer in die stadsraad. Die PA het drie lede in die raad. Tydens die aankondiging het PA-lede dit baie duidelik gestel dat die party daarop uit is om 'n volstrekte meerderheid te behaal.

Fredericks kom van Pacaltsdorp en het in die verlede tydens 'n munisipale verkiesing die DA-vaandel in wyk 27 gedra. Hy het in 'n stadium uit die DA bedank.

Vir baie het die PA se aankondiging om nou al sy burgemeesterskandidaat aan te kondig as 'n verrassing gekom. Bazil Petrus, LPP en die PA se kiesafdelingshoof vir George, het egter tydens 'n nuuskonferensie die party se besluit verduidelik.