மண்டல-மகரவிளக்கு பூஜை: சபரிமலை கோயில் நடைதிறப்பு

கேரள மாநிலம், சபரிமலையில் உள்ள பிரசித்தி பெற்ற சுவாமி ஐயப்பன் கோயிலில் வருடாந்திர மண்டல-மகரவிளக்கு பூஜை காலத்தையொட்டி ஞாயிற்றுக்கிழமை நடை திறக்கப்பட்டது.

- 

மலையாள மாதமான விருச்சிகம் (கார்த்திகை) முதல் நாளான திங்கள்கிழமை (நவ. 17) மண்டல பூஜை காலம் தொடங்குகிறது. இதையொட்டி, பக்தர்களின் சரண கோஷத்துடன் ஐயப்பன் கோயில் நடை ஞாயிற்றுக்கிழமை மாலை 5 மணியளவில் திறக்கப்பட்டது.

தந்திரி கண்டரரு மகேஷ் மோகனரு முன்னிலையில் மேல்சாந்தி அருண்குமார் நம்பூதிரி கருவறைக் கதவைத் திறந்து, சடங்குகளை மேற்கொண்டார். இதைத் தொடர்ந்து, சபரிமலை புதிய மேல்சாந்தியாக இ.டி.பிரசாத், மாளிகைப்புரம் தேவி கோயிலின் புதிய மேல்சாந்தியாக எம்.ஜி.மனு நம்பூதிரி ஆகியோர் பொறுப்பேற்றுக் கொண்டனர்.

பின்னர், பக்தர்கள் தரிசனத்துக்கு அனுமதிக்கப்பட்டனர். சந்நிதானம், யாத்திரை பாதை மற்றும் அடிவார முகாம்களில் முதல் நாளிலேயே பக்தர்கள் கூட்டம் அலைமோதியது.

விரிவான ஏற்பாடுகள்:

மண்டல பூஜை யாத்திரையின் (41 நாள்கள்) முக்கிய நிகழ்வான மண்டல பூஜை டிசம்பர் 27-ஆம் தேதி நடைபெறவுள்ளது. அப்போது, ஐயப்பனுக்கு தங்க அங்கி சாத்தப்பட்டு, சிறப்புத் தீபாராதனை நடைபெறும். அன்றிரவு நடை அடைக்கப்பட்டு, மகரவிளக்கு பூஜைக்காக டிசம்பர் 30-ஆம் தேதி மீண்டும் திறக்கப்படும். மகர ஜோதி தரிசனம் ஜனவரி 14-ஆம் தேதி நடைபெறவுள்ளது.