அனைத்து வாக்காளர்களையும் உள்ளடக்கியதே வாக்காளர் பட்டியல் திருத்தம் தேர்தல் ஆணையம் விளக்கம்

பிகார் மாநிலத்தில் உள்ள அனைத்து வாக்காளர்களையும் உள்ளடக்கியே வாக்காளர் பட்டியல் சிறப்பு தீவிர திருத்த நடவடிக்கை மேற்கொள்ளப்பட்டு வருகிறது என இந்திய தேர்தல் ஆணையம் செவ்வாய்க்கிழமை தெரிவித்தது.

- 

புது தில்லி, ஜூலை 8:

வாக்காளர் பட்டியல் சிறப்பு தீவிர திருத்தம் குறித்து இந்திய தேர்தல் ஆணைய அதிகாரிகள் செவ்வாய்க்கிழமை கூறியதாவது: பிகாரில் மொத்தமுள்ள 7,89,69,844 வாக்காளர்களையும் உள்ளடக்கியே இந்தப் பணிகள் மேற்கொள்ளப்படுகின்றன. பெயர், முகவரி, புகைப்படம் உள்ளிட்ட தகவல்களை உள்ளீடு செய்யும் வகையிலான விண்ணப்பங்கள் 7.69 கோடி வாக்காளர்களுக்கு (97.42) வழங்கப்பட்டுள்ளது.

இந்த விண்ணப்ப படிவங்களை வாக்காளர்கள் நிரப்பிய பின்பு அதைப் பெறுவதற்கு ஒவ்வொரு வீட்டுக்கும் பூத் அளவிலான அதிகாரிகள் குறைந்தபட்சம் மூன்று முறை நேரில் செல்கின்றனர். எந்தவொரு வாக்காளரும் விடுபட்டுவிடக்கூடாது என்பதில் தேர்தல் ஆணையம் உறுதியாக உள்ளது.