கருணாநிதியின் மூத்த மகன் மு.க.முத்து காலமானார்

முன்னாள் முதல்வர் கருணாநிதியின் மூத்த மகனும், முதல்வர் மு.க.ஸ்டாலினின் சகோதரருமான மு.க.முத்து (77) சென்னையில் சனிக்கிழமை (ஜூலை 19) காலமானார்.

- 

சென்னை, ஜூலை 19:

முன்னாள் முதல்வர் கருணாநிதி - பத்மாவதி தம்பதிக்கு 1948-ஆம் ஆண்டு பிறந்தவர் மு.க.முத்து. 1970-இல் தனது நடிப்பு பயணத்தைத் தொடங்கிய அவர், 'பூக்காரி', 'பிள்ளையோ பிள்ளை', 'அணையா விளக்கு', 'சமையல்காரன்', 'இங்கேயும் மனிதர்கள்' உள்ளிட்ட படங்களில் நடித்தார்.

நடிப்பிலும், வசன உச்சரிப்பிலும், உடல் மொழியிலும் தனிப்பாணியை அமைத்துக் கொண்டார்.

மு.க.முத்துவின் தாயார் பத்மாவதியின் சகோதரர், சிதம்பரம் ஜெயராமன் ஆவார். இசைக் குடும்பத்தில் இருந்து வந்த மு.க.முத்துவும் நன்றாகப் பாடல்களைப் பாடும் திறமை பெற்றிருந்தார். 'நல்ல மனதில் குடியிருக்கும் நாகூர் ஆண்டவா' என்ற பாடலும், 'சொந்தக்காரங்க எனக்கு ரொம்ப பேருங்க' என்ற பாடலும் இன்றும் பலரால் ரசிக்கக் கூடியவையாக இருக்கின்றன.

கடைசியாக 2008-ஆம் ஆண்டு இசையமைப்பாளர் தேவாவின் இசையில் 'மாட்டுத்தாவணி' படத்தில் ஒரு பாடலைப் பாடி இருக்கிறார் மு.க.முத்து.