உங்களுடன் ஸ்டாலின் திட்டம்: மனுக்களுக்கு 45 நாள்களில் தீர்வு

கூடுதல் தலைமைச் செயலர் பெ.அமுதா

- 

சென்னை, ஜூலை 14: 'உங்களுடன் ஸ்டாலின்' திட்டத்தின் கீழ் பெறப்படும் மனுக்கள் மீது 45 நாள்களுக்குள் தீர்வு காணப்படும் என்று வருவாய் மற்றும் பேரிடர் மேலாண்மைத் துறை கூடுதல் தலைமைச் செயலர் பெ.அமுதா தெரிவித்தார்.

கடலூர் மாவட்டம், சிதம்பரம் நகராட்சியில் 'உங்களுடன் ஸ்டாலின்' திட்டத்தை முதல்வர் மு.க.ஸ்டாலின் செவ்வாய்க்கிழமை தொடங்கி வைக்கிறார். இந்த திட்டத்தின் சிறப்பம்சங்கள் குறித்து, தலைமைச் செயலகத்தில் செய்தியாளர்களுக்கு வருவாய்த் துறை கூடுதல் தலைமைச் செயலர் பெ.அமுதா அளித்த பேட்டி:

'உங்களுடன் ஸ்டாலின்' திட்டத்தை கடலூர் மாவட்டம் சிதம்பரம் நகராட்சியில் முதல்வர் தொடங்கி வைக்கிறார். இந்த திட்டம் முதல்வரின் முகவரித் துறை வழியே செயல்படுத்தப்பட உள்ளது. இதற்காக முகாம்கள் நடைபெறும் பகுதியில் ஏற்கனவே வீடு வீடாக விழிப்புணர்வு பணிகள் மேற்கொள்ளப்பட்டுள்ளன.

நகரப் பகுதிகளில் 13 துறைகள் மூலம் 43 சேவைகளும், ஊரகப் பகுதிகளில் 15 துறைகள் வழியாக 46 சேவைகளும் அளிக்கப்பட உள்ளன. இந்த திட்டத்தின் கீழ் பெறப்படும் மனுக்களுக்கு 45 நாள்களுக்குள் தீர்வு காண வேண்டும். அவர்கள் தரும் பதில்கள் திருப்தி இல்லாவிட்டால் மேல்முறையீடு செய்யலாம். மனுதாரர்கள் தங்களின் மனுக்களின் நிலைமையை இணையதளம் வழியாக தெரிந்து கொள்ளலாம். இதற்கான பிரத்யேக இணையதளத்தை சிதம்பரத்தில் நடைபெறும் விழாவில் முதல்வர் தொடங்கி வைக்கிறார். மக்களுடன் முதல்வர் திட்டத்தின் கீழ் பெறப்பட்ட மனுக்களுக்கு தீர்வு காண்பதற்கான கால அளவு 30 நாள்களாக இருந்தது. 'உங்களுடன் ஸ்டாலின்' திட்டத்தில் விண்ணப்பத்துக்கு தீர்வு காணும் அளவு 45 நாள்களாக உயர்த்தப்பட்டுள்ளது.