பிகார் முதல்வராக நிதீஷ் குமார் இன்று பதவியேற்பு

பிகார் முதல்வராக ஐக்கிய ஜனதா தளம் (ஜேடியு) தலைவர் நிதீஷ் குமாரை தேசிய ஜனநாயக கூட்டணி புதன்கிழமை முறைப்படி தேர்வு செய்தது.

- 

அவரது தலைமையிலான புதிய அரசு வியாழக்கிழமை (நவ. 20) பதவியேற்கிறது. பிகார் முதல்வராக நிதீஷ் குமார் பதவியேற்கவிருப்பது, இது 10-ஆவது முறையாகும்.

பிகார் பேரவைத் தேர்தலில் மொத்தமுள்ள 243 தொகுதிகளில் 202 இடங்களைக் கைப்பற்றிய தேசிய ஜனநாயக கூட்டணி, அசைக்க முடியாத பெரும்பான்மையுடன் ஆட்சியைத் தக்கவைத்தது. பாஜக 89 இடங்களுடன் தனிப்பெரும் கட்சியாக உருவெடுத்தது. ஐக்கிய ஜனதா தளம் 85, மத்திய அமைச்சர் சிராக் பாஸ்வானின் லோக் ஜனசக்தி (ராம் விலாஸ்) 19, மத்திய அமைச்சர் ஜிதன் ராம் மாஞ்சியின் ஹிந்துஸ்தானி அவாம் மோர்ச்சா 5, மாநிலங்களவை எம்.பி. உபேந்திர குஷ்வாஹாவின் ராஷ்ட்ரீய லோக் மோர்ச்சா 4 இடங்களைக் கைப்பற்றின.

ஐக்கிய ஜனதா தளத்தைவிட பாஜக அதிக தொகுதிகளில் வென்றதால், நிதீஷ் குமார் முதல்வராகத் தொடர்வாரா என்ற கேள்வி நிலவிய சூழலில், அவரே மீண்டும் முதல்வர் என்பதை கூட்டணிக் கட்சிகள் உறுதி செய்தன.