வாக்காளர் பட்டியலில் பெயர் சேர்ப்பு, நீக்கம்: தேர்தல் ஆணையத்துக்கே அதிகாரம்

வாக்காளர் பட்டியலில் பெயர்களைச் சேர்ப்பதும், நீக்குவதும் தேர்தல் ஆணையத்தின் அதிகார வரம்புக்குள்ப்பட்டது என்று உச்சநீதிமன்றம் செவ்வாய்க்கிழமை தெரிவித்தது.

- 

புது தில்லி, ஆக.12:

பிகார் வாக்காளர் பட்டியல் சிறப்பு தீவிர திருத்தப் பணிகளுக்கு எதிராக எதிர்க்கட்சியினர், தன்னார்வ அமைப்பினர் தாக்கல் செய்த மனுக்கள் உச்சநீதிமன்ற நீதிபதிகள் சூர்ய காந்த், ஜாய்மால்ய பாக்சி ஆகியோர் அடங்கிய அமர்வு முன்பாக செவ்வாய்க்கிழமை விசாரணைக்கு வந்தது.

வாக்குரிமையை இழக்கும் வாதம் செயலிழப்பு: அப்போது பேசிய நீதிபதிகள், 'பிகாரில் வாக்காளர் பட்டியல் சிறப்பு தீவிர திருத்தப் பணிகளுக்கு இணங்கி, அங்குள்ள 7.9 கோடி வாக்காளர்களில் 7.24 கோடி வாக்காளர்கள் விவரக்குறிப்பு படிவங்களை சமர்ப்பித்துள்ளனர். இது அந்தப் பணிகளால் ஒரு கோடி பேர் வாக்குரிமையை இழக்கக் கூடும் என்ற வாதத்தை செயலிழக்கச் செய்கிறது' என்று தெரிவித்தனர்.

மனுதாரர் ஒருவர் தரப்பில் ஆஜரான மூத்த வழக்குரைஞர் கபில் சிபல், 'சிறப்பு தீவிர திருத்தத்திற்காக தேர்தல் ஆணையம் குறிப்பிட்ட ஆவணங்கள், பெரும்பாலான பிகார் மக்களிடம் இல்லை' என்றார்.