டிரம்ப்புடனான மோதல் எதிரொலி புதிய கட்சி தொடங்கினார் எலான் மஸ்க்

அமெரிக்காவின் பிரபல தொழிலதிபரான எலான் மஸ்க், அந்நாட்டு அதிபர் டொனால்ட் டிரம்ப் புடனான மோதலைத் தொடர்ந்து 'அமெரிக்கா கட்சி' எனும் புதிய அரசியல் கட்சியைத் தொடங்கினார்.

- 

நியூ யார்க், ஜூலை 6:

அமெரிக்க மக்களுக்கு தங்களின் சுதந்திரத்தை மீட்டளிப்பதே அமெரிக்கா கட்சியின் நோக்கம் எனவும் எலான் மஸ்க் தனது எக்ஸ் பதிவில் குறிப்பிட்டுள்ளார்.

கடந்த 2024-ஆம் ஆண்டு நடைபெற்ற அமெரிக்க அதிபர் தேர்தலில், குடியரசுக் கட்சி வேட்பாளரான டொனால்ட் டிரம்ப்புக்கு ஆதரவாக தீவிர பிரசாரம் மேற்கொண்டார் 'டெஸ்லா' நிறுவனரும், தொழிலதிபருமான எலான் மஸ்க். டிரம்ப்பின் தேர்தல் பிரசாரத்துக்கு தனிப்பட்ட முறையில் அதிக நிதி அளித்தவர்களில் எலான் மஸ்க் முதலிடத்தில் இருந்தார்.

அதிபர் தேர்தலில் ஜனநாயகக் கட்சி வேட்பாளரும் முன்னாள் துணை அதிபருமான கமலா ஹாரீஸை டிரம்ப் வீழ்த்தினார். தொடர்ந்து, கடந்த ஜனவரியில் அமெரிக்க அதிபராக டிரம்ப் 2-ஆவது முறை பொறுப்பேற்றார்.

டிரம்ப் நிர்வாகத்தில், அமெரிக்க அரசு செயல்திறன் மேம்பாட்டுத் துறை புதிதாக உருவாக்கப்பட்டு, அதற்கு எலான் மஸ்க் முக்கிய ஆலோசகராக நியமிக்கப்பட்டார். இவர்கள் இருவருக்கும் இடையேயான ஒற்றுமை, உலக அளவில் கவனம் ஈர்த்தது. அதேநேரம், டிரம்ப் நிர்வாகத்தின் சில சர்ச்சைக்குரிய சர்வதேச முடிவுகள் பல நாடுகளிடையே பதற்றத்தை ஏற்படுத்தின.