ராகுல் காந்தி பிறந்த நாள்

மக்களவை எதிர்கட்சித் தலைவர் ராகுல் காந்தி பிறந்தநாளையொட்டி மன்னார்குடியில் காங்கிரஸ் சார்பில் இனிப்பு வழங்கி கொண்டாடப்பட்டது.

- 

மன்னார்குடி, ஜூன் 19:

தேரடி காந்தி சிலை அருகே வியாழக்கிழமை நடைபெற்ற நிகழ்ச்சிக்கு காங்கிரஸ் நகரத் தலைவர் ஆர். கனகவேல் தலைமை வகித்தார். சட்டப்பேரவை தொகுதி பொறுப்பாளர் ஜி. குணசேகரன், மாவட்டச் செயலர் சங்கு கோபால் முன்னிலை வகித்தனர்.

இப்பகுதியில் உள்ள காந்தி, இந்திராகாந்தி சிலைகளுக்கு மாலை அணிவித்து, பட்டாசு வெடித்து பொதுமக்களுக்கு இனிப்பு வழங்கி ராகுல் காந்தியை வாழ்த்தி முழக்கமிட்டனர்.

பொதுக்குழு உறுப்பினர் வி. அனந்தகிருஷ்ணன், மன்னார்குடி கிழக்கு வட்டாரத் தலைவர் ஜி. அன்பழகன், நகர துணைத் தலைவர் ஆர். ரவிச்சந்திரன் உள்ளிட்டோர் கலந்து கொண்டனர்.

பரவாக்கோட்டையில் வியாழக்கிழமை மாலை நடைபெற்ற நிகழ்ச்சிக்கு காங்கிரஸ் கிளை கமிட்டி தலைவர் எஸ். சஞ்சய் தலைமை வகித்தார். மன்னார்குடி மேற்கு வட்டாரத் தலைவர் எஸ். செல்வராஜ் முன்னிலை வகித்தார். மாரியம்மன் கோயிலில் ராகுல் காந்தி பெயரில் சிறப்பு அர்ச்சனையும் பூஜையும் நடைபெற்று பொதுமக்களுக்கு இனிப்பு வழங்கப்பட்டது. மாவட்ட துணைத் தலைவர் எம். கலியபெருமாள், கிளைப் பொருளாளர் எஸ். காமராஜ் உள்ளிட்டோர் கலந்துகொண்டனர்.

நீடாமங்கலத்தில்... நீடாமங்கலம் நகர, வட்டார காங்கிரஸ் கமிட்டி சார்பில் ராகுல் காந்தி பிறந்தநாளையொட்டி சதுர்வேத விநாயகர், மகா மாரியம்மன் கோயிலில் சிறப்பு வழிபாடு வியாழக்கிழமை நடைபெற்றது. காங்கிரஸ் மாவட்ட துணைத்தலைவர் நீலன். அசோகன் தலைமை வகித்தார்.