தூர்வாரும் பணிகளை விரைந்து முடிக்க வலியுறுத்தல்

திருவாரூர் மாவட்டத்தில், தூர்வாரும் பணிகளை விரைந்து முடிக்க வேண்டும் என விவசாயிகள் குறைதீர்க்கும் நாள் கூட்டத்தில் வலியுறுத்தப்பட்டது.

- 

திருவாரூர், ஏப். 24:

இக்கூட்டம், திருவாரூர் மாவட்ட ஆட்சியர் அலுவலக கூட்டரங்கில் வியாழக்கிழமை நடைபெற்றது. ஆட்சியர் வ. மோகனச்சந்திரன் தலைமை வகித்தார். கூட்டத்தில், பஹல்காம் தாக்குதலில் உயிரிழந்தவர்களுக்கு 2 நிமிட மௌன அஞ்சலி செலுத்தப்பட்டது.

பின்னர், தூர்வாரும் பணிகள், மழைப் பாதிப்புக்கு நிவாரணம், சாலை சீரமைப்பு உள்ளிட்ட பல்வேறு கோரிக்கைகள் குறித்து விவசாயிகள் பேசியது:

கொரடாச்சேரி வி. தம்புசாமி: திருவாரூர் மாவட்டத்தில் தொடங்கப்பட்டுள்ள தூர்வாரும் பணிகளை உரிய முறையில் கண்காணித்து, விரைந்து முடிக்க நடவடிக்கை எடுக்க வேண்டும். வெட்டாறிலிருந்து பிரியும் 18 வாய்க்கால்களில், பல ஆண்டுகளாக தூர்வாராததாலும், மணல் அள்ளியதாலும் தண்ணீர் செல்வதில் சிரமம் ஏற்பட்டுள்ளது. எனவே, சீரான வகையில் தண்ணீர் செல்ல படுக்கை அணை அமைக்க நடவடிக்கை எடுக்க வேண்டும். அத்துடன், முகத்துவாரங்களில் தண்ணீர் இறைக்க உதவும் இயந்திரங்களின் பழுதை நீக்கி புதிதாக அமைக்க வேண்டும்.