தமிழக அரசு கடன்: பேரவையில் கடும் விவாதம்

தமிழக அரசின் கடன் குறித்து பேரவையில் திங்கள்கிழமை எதிர்க்கட்சித் தலைவர், ஆளும் கட்சியினர் இடையே கடும் விவாதம் நடைபெற்றது.

- 

சென்னை, மார்ச் 17: தமிழக அரசின் கடன் குறித்து பேரவையில் திங்கள்கிழமை எதிர்க்கட்சித் தலைவர், ஆளும் கட்சியினர் இடையே கடும் விவாதம் நடைபெற்றது. அப்போது 'கடன் பெற்றாலும் சமூக நலத்திட்டங்களுக்கே செலவழிக்கிறோம்' என்று நிதியமைச்சர் தங்கம் தென்னரசு விளக்கம் அளித்தார்.

பேரவையில் தமிழக அரசின் நிதி நிலை அறிக்கை மீதான விவாதத்தில் அதிமுக உறுப்பினர் கே.பி.முனுசாமி பேசியதாவது:

2023-இல் ஒரு டிரில்லியன் பொருளாதாரம் என்கிற இலக்குடன் அரசு செயல்படுவதாகக் கூறுகிறீர்கள். ஆனால், அரசு சொல்லும் புள்ளி விவரங்களின் அடிப்படையில் பார்த்தாலே அந்த இலக்கை அடைவதற்கான வாய்ப்பு தெரியவில்லை. தமிழக அரசின் மொத்தக் கடன் ரூ.8.5 லட்சம் கோடியாக உள்ளது. கடந்த 4 ஆண்டுகாலத்தில் ரூ.4 லட்சம் கோடி கடன் பெறப்பட்டுள்ளது. தமிழக அரசு வரி விதிக்கக்கூடிய இனங்களில் கூடுதலாகத்தான் வரி விதிக்கப்பட்டுள்ளது. அதேபோல கட்டணங்கள் உயர்த்தக்கூடிய எல்லா இனங்களிலும் கூடுதலாகத்தான் உயர்த்தப்பட்டுள்ளது. இதனால், தமிழகத்துக்கு கூடுதலாக நிதி ஆதாரம் கிடைத்துள்ளது. ஆனால், புதிய திட்டங்கள் ஏதாவது வந்துள்ளனவா என்றால், இல்லை என்றார்.