திடக்கழிவு மேலாண்மை ஒப்பந்தப் பணியில் முறைகேடு?

திருநெல்வேலி மாநகராட்சியில் திடக்கழிவு மேலாண்மைப் பணிகளை மேற்கொண்டு வரும் ராம் அன் கோ நிறுவனம் பல்வேறு முறைகேடுகளில் ஈடுபட்டுள்ளதாகவும், அதுகுறித்து விசாரிக்க வேண்டும் எனவும் வலியுறுத்தி மாநகராட்சி ஆணையர் மோனிகா ராணாவிடம் திருநெல்வேலி மாநகர் மாவட்ட அதிமுக செயலர் தச்சை என்.கணேசராஜா தலைமையில் அக்கட்சியினர் செவ்வாய்க்கிழமை மனு அளித்தனர்.

- 

திருநெல்வேலி, ஆக.19:

அதன் விவரம்: திருநெல்வேலி மாநகராட்சிக்கு உள்பட்ட 55 வார்டுகளில் திடக்கழிவு மேலாண்மை பணிகளை மேற்கொள்ள கடந்த 2023இல் தனியார் ஒப்பந்தப்புள்ளி கோரப்பட்டு ரூ.36 கோடி தொகை நிர்ணயிக்கப்பட்டது. அதில் 2 தனியார் ஒப்பந்தப்புள்ளிகள் பங்கேற்றன. குறைந்தபட்ச தொகையாக ரூ.32.52 கோடிக்கு ஒப்பந்தம் கோரிய ராம் அன் கோ நிறுவனத்திற்கு அப்பணி ஒதுக்கப்பட்டது.

ஆனால் அந்நிறுவனத்தில் திடக்கழிவு பணிக்கான கட்டமைப்புகளோ, சொந்த வாகனங்களோ, தனது நிறுவனம் சார்ந்த தூய்மை பணியாளர்களோ இல்லை. போலி ஆவணங்கள் மூலமாக ஒப்பந்தப் பணியைப் பெற்று மாநகராட்சிக்கு பெரும் நிதி இழப்பை ஏற்படுத்தியுள்ளது.