மக்களின் வாக்குரிமையைக் காக்க ஓரணியில் எதிர்க்கட்சிகள்: கார்கே

மக்களின் வாக்குரிமையைக் காப்பது மிக முக்கியம்; எனவேதான், பிகார் வாக்காளர் பட்டியல் சிறப்பு தீவிர திருத்தப்பணி குறித்து நாடாளுமன்றத்தில் விவாதம் கோருவதில் 'இண்டி' கூட்டணி கட்சிகள் ஒன்றுபட்டுள்ளன என்று காங்கிரஸ் தலைவர் மல்லிகார்ஜுன கார்கே புதன்கிழமை தெரிவித்தார்.

- 

புது தில்லி, ஆக. 6: 'மக்களின் வாக்குரிமையைக் காப்பது மிக முக்கியம்; எனவேதான், பிகார் வாக்காளர் பட்டியல் சிறப்பு தீவிர திருத்தப்பணி குறித்து நாடாளுமன்றத்தில் விவாதம் கோருவதில் 'இண்டி' கூட்டணி கட்சிகள் ஒன்றுபட்டுள்ளன' என்று காங்கிரஸ் தலைவர் மல்லிகார்ஜுன கார்கே புதன்கிழமை தெரிவித்தார்.

நடப்பாண்டு இறுதியில் பேரவைத் தேர்தல் நடைபெறவிருக்கும் பிகாரில் வாக்காளர் பட்டியல் சிறப்பு தீவிர திருத்தப் பணியை மேற்கொண்ட தேர்தல் ஆணையம், அண்மையில் வரைவுப் பட்டியலை வெளியிட்டது. இதில் 65 லட்சம் பேரின் பெயர்கள் இடம்பெறவில்லை. இந்த விவகாரம் தொடர்பாக, நாடாளுமன்றத்தில் சிறப்பு விவாதம் நடத்தப்பட வேண்டும் என எதிர்க்கட்சிகள் தொடர்ந்து போராடி வருகின்றன. இந்நிலையில், தில்லியின் விஜய் சௌக் பகுதியில் இண்டி கூட்டணி கட்சித் தலைவர்கள் கூட்டாக பேட்டியளித்தனர். அப்போது, காங்கிரஸ் தலைவர் மல்லிகார்ஜுன கார்கே கூறியதாவது:

வாக்காளர் பட்டியல் சிறப்பு தீவிர திருத்தம் என்ற பெயரில் மக்களின் வாக்குரிமை திருட்டை அனுமதிக்கக் கூடாது என்று மக்களவைத் தலைவர், மாநிலங்களவை துணைத் தலைவர் மற்றும் மத்திய அரசிடம் தொடர்ந்து வலியுறுத்தி வருகிறோம்.