'சமக்ர சிக்ஷா' திட்ட நிதியை நிபந்தனையின்றி விடுவிக்க வேண்டும்

பிஎம்ஸ்ரீ புரிந்துணர்வு ஒப்பந்தத்தில் கையொப்பமிடுவதை நிபந்தனையாக்காமல், நிலுவையில் உள்ள சமக்ர சிக்ஷா திட்ட நிதியை தமிழகத்துக்கு விடுவிக்க வேண்டும் என பிரதமர் நரேந்திர மோடியிடம், தமிழக அரசு சார்பில் கோரிக்கை மனு அளிக்கப்பட்டது.

- 

சென்னை, ஜூலை 27: பிஎம்ஸ்ரீ புரிந்துணர்வு ஒப்பந்தத்தில் கையொப்பமிடுவதை நிபந்தனையாக்காமல், நிலுவையில் உள்ள சமக்ர சிக்ஷா திட்ட நிதியை தமிழகத்துக்கு விடுவிக்க வேண்டும் என பிரதமர் நரேந்திர மோடியிடம், தமிழக அரசு சார்பில் கோரிக்கை மனு அளிக்கப்பட்டது.

இருநாள் அரசு முறை பயணமாக தமிழகத்துக்கு வந்த பிரதமர் மோடியிடம், தமிழகத்தில் நிறைவேற்றப்பட வேண்டிய முக்கிய திட்டங்கள் மற்றும் கோரிக்கைகள் குறித்த மனு தமிழக முதல்வர் மு.க.ஸ்டாலின் சார்பில் வழங்கப்பட்டது. இது தொடர்பாக தமிழக அரசு சார்பில் ஞாயிற்றுக்கிழமை வெளியிடப்பட்ட செய்திக்குறிப்பு:

தமிழக அரசால் 2018-ஆம் ஆண்டு முதல் 'சமக்ர சிக்ஷா திட்டம்' செயல்படுத்தப்பட்டு வருகிறது. இத்திட்டத்தின் கீழ், தமிழகம் தொடர்ந்து செயல்திறனை அதிகரித்துள்ளது. இந்த நிலையில், தேசியக் கல்விக் கொள்கை -2020 முழுமையாக அமல்படுத்த வேண்டும் என்ற நிபந்தனையை மத்திய அரசு வைத்துள்ளது. ஆனால், தமிழக அரசு சட்டபூர்வ மற்றும் கொள்கை அடிப்படைகளில் தேசியக் கல்விக் கொள்கையின் சில அம்சங்களில், குறிப்பாக மும்மொழிக்கொள்கை மற்றும் 5+3+3+4 கட்டமைப்பில் பள்ளிக் கட்டமைப்பு மாற்றம் ஆகியவற்றில் தனது மாற்றுக் கருத்துகளை தெரிவித்துள்ளது.