இறுதிச்சுற்றில் சபலென்கா - பெகுலா பலப்பரீட்சை

எலா, பாலினி வெளியேறினர்

- 

மியாமி கார்டன்ஸ், மார்ச் 28: அமெரிக்காவில் நடைபெறும் மியாமி ஓபன் டென்னிஸ் போட்டியில் மகளிர் ஒற்றையர் இறுதிச்சுற்றில் பெலாரஸின் அரினா சபலென்கா - அமெரிக்காவின் ஜெஸ்ஸிகா பெகுலா ஆகியோர் சனிக்கிழமை பலப்பரீட்சை நடத்தவுள்ளனர்.

முன்னதாக வெள்ளிக்கிழமை நடைபெற்ற அரையிறுதிச்சுற்றில், உலகின் நம்பர் 1 வீராங்கனையான சபலென்கா 6-2, 6-2 என்ற நேர்செட்களில் மிக எளிதாக, போட்டித்தரவரிசையில் 6-ஆம் இடத்தில் இருந்த இத்தாலியின் ஜாஸ்மின் பாலினியை வெளியேற்றினார்.

1 மணி நேரம், 11 நிமிஷங்களில் முடிவுக்கு வந்த இந்த ஆட்டத்தில், சபலென்கா எந்தவொரு கட்டத்திலும் பாலினியை முன்னிலைபெற விடவில்லை. இரு செட்களிலுமே தலா ஒரு முறை மட்டும் 1-1 என்ற சமநிலையை இருவரும் எட்டினர். சபலென்காவே ஆட்டத்தில் ஆதிக்கம் செலுத்தினார்.

சபலென்கா 6 ஏஸ்களை பறக்க விட்டதுடன், பாலினியின் 4 சர்வ்களை பிரேக் செய்தார். கடைசியில் வெற்றி பெற்ற அவர், இந்தப் போட்டியில் முதல் முறையாக இறுதிச்சுற்றுக்கு முன்னேறியுள்ளார்.

மேலும், கடந்த 20 ஆண்டுகளில் இண்டியன் வெல்ஸ் ஓபன், மியாமி ஓபன் ஆகிய இரு அடுத்தடுத்த போட்டிகளில் இறுதிச்சுற்றுக்கு முன்னேறிய 6-ஆவது வீராங்கனை ஆகியிருக்கிறார் சபலென்கா.