தடைகளைத் தகர்த்த செவிக் குறைபாடு மாற்றுத்திறனாளிகள்!

பிறவியிலேயே செவித்திறன் பாதிப்புக்குள்ளாகி காக்ளியர் இம்ப்ளாண்ட் சிகிச்சை மூலம் மறுவாழ்வு பெற்ற இளைஞர் ஐஏஎஸ் தேர்ச்சி பெற்றும், இளம்பெண் எம்பிபிஎஸ் இடத்தைப் பெற்றும் சாதனை படைத்துள்ளனர்.

- 

சென்னை, ஆக. 12:

தடைகளை உடைத்து தன்னம்பிக்கையால் வென்ற அந்த இருவருக்கும், சென்னை காது-மூக்கு-தொண்டை ஆராய்ச்சி நிறுவனத்தின் தலைவரும், முதுநிலை மருத்துவ நிபுணருமான டாக்டர் மோகன் காமேஸ்வரன் பல ஆண்டுகளுக்கு முன்பாகவே காக்ளியர் இம்ப்ளாண்ட் சிகிச்சையை மேற்கொண்டு புது விடியலை ஏற்படுத்தியுள்ளார்.

இதுதொடர்பாக டாக்டர் மோகன் காமேஸ்வரன் கூறியதாவது: பிகார் மாநிலம், பாட்னாவில் கடந்த 1999-இல் பிறந்தவர் யாஷ். வங்கி அதிகாரியின் மகனான அவருக்கு பிறவியிலேயே செவித்திறன் கிடையாது. பிறந்து இரண்டு ஆண்டுகளுக்குப் பிறகே அதைக் கண்டறிந்து செவித்திறன் கருவி பொருத்தினர். ஆனால், அது பலனளிக்காததால், கடந்த 2002-இல் சென்னைக்கு வந்து எங்களிடம் சிகிச்சை பெற்றார். பொதுவாக பிறவிக் குறைபாடு உடைய குழந்தைகளுக்கும், செவித்திறன் கருவிகள் பொருத்தியும் பயனளிக்காதவர்களுக்கும் காக்ளியர் இம்ப்ளாண்ட் எனப்படும் செவி மடு சுருள் கருவியை அறுவை சிகிச்சை மூலம் பொருத்தும் சிகிச்சை அளிக்கப்படுகிறது.