ஆசிய சிங்கங்கள் கணக்கெடுப்பு மே மாதம் தொடக்கம்

16-ஆவது ஆசிய சிங்கங்கள் கணக்கெடுப்பு பணிகள் வரும் மே மாதம் தொடங்கவுள்ளதாக பிரதமர் நரேந்திர மோடி தெரிவித்தார்.

- 

சாசன் (குஜராத்), மார்ச் 3:

உலக வனவிலங்குகள் தினத்தையொட்டி (மார்ச் 3) குஜராத்தின் ஜுனாகத் மாவட்டத்தில் தேசிய வன விலங்கு வாரியத்தின் 7-ஆவது கூட்டத்துக்கு திங்கட்கிழமை தலைமை தாங்கியபோது அவர் இந்த அறிவிப்பை வெளியிட்டார்.

இந்தக் கூட்டத்தில் மத்திய சுற்றுச்சூழல் துறை அமைச்சர் பூபேந்தர் யாதவ் பங்கேற்றார்.

அப்போது ஜுனாகத் மாவட்டத்தில் வனவிலங்கு தேசிய பரிந்துரை மையம் அமைப்பதற்கு பிரதமர் மோடி அடிக்கல் நாட்டினார். நதி டால்பின்கள் குறித்த புத்தகத்தை அவர் வெளியிட்டார்.

கோயம்புத்தூரில் சிறப்பு மையம்: மேலும், தமிழகத்தின் கோயம்புத்தூர் மாவட்டத்தில் மனித-வனவிலங்கு இடையேயான மோதல்களைத் தடுக்கும் நடவடிக்கைகளை நிர்வகிப்பதற்கான சிறப்பு மையம் அமைக்கப்படும் எனவும் அவர் அறிவித்தார்.