பெற்றோருக்கு நெருக்கடி கொடுக்கும் தனியார் பள்ளிகள்!

கட்டாயக் கல்வி உரிமைச் சட்டத்தின் கீழ் தனியார் பள்ளிகளில் வழங்கப்படும் இலவச சேர்க்கைக்கான நிதியை மத்திய அரசு விடுவிக்காத நிலையில், கல்விக் கட்டணத்தை பெற்றோரிடம் பள்ளிகள் வசூலித்து வருவதாகப் புகார் எழுந்துள்ளது.

- அ. ஜெயச்சந்திரன்

சென்னை, ஜூலை 9:

இலவச கட்டாயக் கல்வி உரிமைச் சட்டத்தின்படி (RTE) தனியார் பள்ளிகளில் 25 சதவீத இடங்களில் ஏழைக் குழந்தைகள் சேர்க்கப்படுவர். மாநிலம் முழுவதும் உள்ள 8,000-க்கும் மேலான தனியார் பள்ளிகளில் 1.10 லட்சம் இடங்கள் உள்ளன. இந்தத் திட்டத்தில் எல்.கே.ஜி அல்லது ஒன்றாம் வகுப்பில் சேருபவர்கள் 8-ஆம் வகுப்பு வரை கட்டணம் செலுத்தாமல் இலவசமாகப் படிக்கலாம். தமிழகத்தில் 2013-இல் அமலான இந்தத் திட்டத்தின் கீழ் இதுவரை சுமார் 8 லட்சம் குழந்தைகள் தனியார் பள்ளிகளில் படித்து வருகின்றனர்.

ரூ.600 கோடி நிலுவை: இந்தத் திட்டத்தின் கீழ் ஆண்டுதோறும் ஏப். 20-ஆம் தேதி முதல் மாணவர் சேர்க்கைக்கான விண்ணப்பப் பதிவு தொடங்கும். ஆனால், தமிழக கல்விக்கான மத்திய அரசின் நிதி நிறுத்தி வைக்கப்பட்டதால் நிகழாண்டில் மாணவர் சேர்க்கை தற்போது வரை தொடங்கப்படவில்லை. இதுதவிர முந்தைய கல்வியாண்டுகளுக்கான நிலுவை என சுமார் ரூ.600 கோடி மத்திய அரசால் வழங்கப்பட வேண்டுமெனக் கூறப்படுகிறது.