புத்த பூர்ணிமா - அன்பின் நிறைவு

சித்ரா பௌர்ணமியான நிறைந்த நன்னாளில் ஆலயங்களில் திருவிழாக்கள் நடைபெற்றுவரும் புண்ணிய தினத்தில் இல்லங்கள்தோறும் வளம் பெருகப் பிரார்த்திக்கிறேன்.

- குடியரசு துணைத் தலைவர் சி.பி. ராதாகிருஷ்ணன்

சகோதர-சகோதரிகள் அனைவருக்கும் புத்த பூர்ணிமா (மே 1) நல்வாழ்த்துகளைத் தெரிவித்து மகிழ்கிறேன்.பாரதம் உலகுக்கு வழங்கியுள்ள கொடைகளில் தலையாயது பௌத்தம். புத்தர்பிரானின் வாழ்வும் வாக்கும் பல கோடி மக்களின் வாழ்வில் வெளிச்சத்தைப் பாய்ச்சுகிறது.

தன்னை அறிதலை உலகுக்குக் கற்றுக் கொடுத்தது பாரதம். புத்தர் என்ற சொல்லுக்கு விழிப்புணர்வு பெற்றவர் என்பதே பொருள். மக்கள் தன்னையறிய வேண்டும் என உழைத்த மகானின் அவதார தினமும் ஞானம் அடைந்த தினமும் ஒரே நாளில் அமைந்திருக்கிறது.

இளவரசனாகப் பிறந்த சித்தார்த்தர் அரச ஆடம்பரத்தில் வளர்ந்தவர். 29-ஆவது வயதில் அரண்மனை, மனைவி, மகன், செல்வம் அனைத்தையும் துறந்து ஆன்மிக அறிவொளிக்கான தேடலோடு அலைந்து திரிந்தார். ஆறு ஆண்டுகாலம் வாழ்வின் உண்மையைத் தேடியவருக்கு புத்த கயாவில் போதி மரத்தடியில் உயர்ந்த ஞானம் உள்ளத்தில் மலர்ந்தது. புத்தர் என்ற மகானாக உயர்ந்தார்.

நான்கு உன்னத உண்மைகளையும், அதை அடைவதற்கான ஐந்து ஒழுக்கங்களையும் சித்தார்த்தர் உணர்ந்த அந்தத் தருணமே ஒரு புதிய சித்தாந்தத்தின் தொடக்கமாகவும் உலக வரலாற்றில் பாரதத்தின் பெருமையாகவும் மலர்ந்தது.

வாரணாசிக்கு அருகிலுள்ள சாரநாத்தில் தனது முதல் போதனையை ஐந்து துறவிகளுக்கு வழங்கினார். 'தர்மத்தின் சக்கரத்தை இயக்குதல்' என்று புகழப்படும் இந்த தர்ம போதனையே பௌத்தத்தின் கோட்பாடாக விரிந்தது. இந்தச் சொற்பொழிவு பௌத்த சமயத்தின் தொடக்கமாக அமைந்தது.

இரண்டாண்டு காலம் மக்களுக்கு அறத்தின் பாதையை எடுத்துச் சொல்லி வந்த புத்தரால் ஈர்க்கப்பட்டு மகத மன்னர் பிம்பிசாரர் ராஜகிரிகாவில் வேணு வனா (மூங்கில் தோப்பு) மடாலயத்தை நன்கொடையாக வழங்கினார். செல்வந்தர் அனதபிண்டிகா, ஜெதவன தோப்பு நிலம் முழுவதையும் தங்க நாணயங்களால் நிறைத்து மடாலயம் எழுப்புவதற்குக் கொடை அளித்தார். அறத்தைப் பின்பற்றுவதில் பாரதம் கொண்டிருந்த நம்பிக்கையின் வெளிப்பாடே இத்தகைய சம்பவங்கள்.

புத்தபிரானின் நான்கு உண்மைகளை மடாலயங்கள் போதித்தன. ஆசையே துன்பத்துக்குக் காரணம்; ஆசையை விலக்குவதால் துன்பத்திலிருந்து விடுபடலாம்; துன்பத்தை அகற்றுவதற்கான எட்டு நெறிகளைப் பின்பற்றுவதன் மூலம் துன்பமற்று வாழலாம். கடந்த காலத்தை எண்ணி வருந்தாமல் நிகழ்காலத்தில் வாழுங்கள்.