தஞ்சையில் முழுப் பயன்பாட்டுக்கு வராத ஆம்னி பேருந்து நிலையம்

தஞ்சாவூரில் ஆம்னி பேருந்துகளுக்கு தனியாக பேருந்து நிலையம் திறக்கப்பட்டு, கிட்டத்தட்ட 2 ஆண்டுகளாகியும் இன்னும் முழுமையான பயன்பாட்டுக்கு வராததால், ராசா மிராசுதார் மருத்துவமனை சாலையில் வழக்கம்போல போக்குவரத்து நெரிசல் ஏற்படுகிறது.

- நமது நிருபர்

தஞ்சாவூர், ஜூலை 18:

தஞ்சாவூர் பழைய பேருந்து நிலையம் அருகே ராசா மிராசுதார் மருத்துவமனை சாலையோரத்தில் இருந்து சென்னை உள்ளிட்ட பெருநகரங்களுக்கு ஆம்னி பேருந்துகள் இயக்கப்படுவதால், அப்பகுதியில் போக்குவரத்து நெரிசல் ஏற்படுகிறது.

இதைத் தவிர்க்க புதிய பேருந்து நிலையத்தின் பின்புறம் பொலிவுறு நகரத் திட்டத்தின் கீழ் ரூ. 10.41 கோடி மதிப்பில் ஆம்னி பேருந்து நிலையம் கட்டப்பட்டது.

ஏறத்தாழ 5,400 சதுர மீட்டர் பரப்பில் கட்டப்பட்ட இந்தப் பேருந்து நிலையத்தில் 25 பேருந்துகள் நிறுத்துவதற்கேற்ப நடைமேடைகள் அமைக்கப்பட்டுள்ளன. கடைகள், ஆம்னி பேருந்துகளின் அலுவலகங்கள், தங்கும் அறைகள், கழிப்பறைகள், பொருள்கள் வைப்பறை ஆகிய வசதிகளும் உள்ளன.

இந்தப் பேருந்து நிலையம் தமிழ்நாடு முதல்வரால் 2023, ஜூலை 27 ஆம் தேதி திறக்கப்பட்டு, பொதுமக்கள் பயன்பாட்டுக்கு அக்டோபர் 19 ஆம் தேதிதான் கொண்டு வரப்பட்டது. என்றாலும், கிட்டத்தட்ட 2 ஆண்டுகளாகியும் இன்னும் முழுப் பயன்பாட்டுக்கு வரவில்லை.