நீதிமன்ற உத்தரவுப்படி ரகசிய வாக்கெடுப்பு சங்கரன்கோவில் நகர்மன்றத் தலைவர் பதவி இழப்பு உறுதியானது

தென்காசி மாவட்டம் சங்கரன்கோவிலில் வியாழக்கிழமை நடைபெற்ற நகர்மன்றத் தலைவருக்கு எதிரான ரகசிய வாக்கெடுப்பில் நம்பிக்கையில்லா தீர்மானம் வெற்றிபெற்றது என்றும், அவரது பதவி இழப்பு உறுதியானதாகவும் ஆணையர் நாகராஜ் தெரிவித்தார்.

- 

சங்கரன்கோவில், ஜூலை 17:

திமுகவைச் சேர்ந்த உமாமகேஸ்வரி நகர்மன்றத் தலைவராக இருந்தார். அவர் தொடர்ந்து கூட்டங்கள் நடத்தாததால் நகராட்சியில் அடிப்படைப் பணிகள் நடைபெறவில்லை, இதனால் பொதுமக்கள் பாதிக்கப்பட்டுள்ளனர் என்பன போன்ற பல்வேறு குற்றச்சாட்டுகளை கூறியும் அவர் மீது நம்பிக்கையில்லா தீர்மானம் கொண்டுவரக் கோரியும் நகர்மன்றத் துணைத் தலைவர் கண்ணன் உள்ளிட்ட அனைத்து கட்சிகளைச் சேர்ந்த நகர்மன்ற உறுப்பினர்கள் 24 பேர் கடந்த ஜூன் 2 ஆம் தேதி நகராட்சி ஆணையர் (பொ) நாகராஜிடம் மனு அளித்தனர்.

இதைத்தொடர்ந்து ஜூலை 2ஆம் தேதி நகராட்சி ஆணையர் (பொ) நாகராஜன் முன்னிலையில் நடைபெற்ற குரல் வாக்கெடுப்பில் நம்பிக்கை இல்லாதீர்மானம் வெற்றி பெற்றதையடுத்து நகர்மன்றத் தலைவர் பதவி இழந்தார். இதையடுத்து, அவரது அறை பூட்டி சீல் வைக்கப்பட்டது.