இந்தியாவின் விண்வெளி நாயகன் சுபான்ஷு சுக்லா!

லக்னௌவில் கொண்டாட்டம்

- 

புது தில்லி/லக்னௌ, ஜூலை 15: சர்வதேச விண்வெளி நிலையத்தில் இருந்து ஆய்வுத் தரவுகள் மட்டுமன்றி இந்தியாவின் எதிர்கால விண்வெளி லட்சியங்களையும் கனவுகளையும் சுமந்து பூமிக்கு திரும்பியுள்ளார் நாட்டின் விண்வெளி நாயகன் சுபான்ஷு சுக்லா.

39 வயதாகும் இவர், இந்திய விமானப் படை குரூப் கேப்டன் மற்றும் விமான செயல்பாட்டு பரிசோதனை விமானி ஆவார். இஸ்ரோ மற்றும் நாசா ஆதரவிலான ஆக்ஸியம்-4 திட்டத்தின் கீழ் சர்வதேச விண்வெளி நிலையத்தில் 18 நாட்கள் தங்கியிருந்த சுக்லா உள்ளிட்ட 4 வீரர்களும், தங்களின் பயணத்தை வெற்றிகரமாக நிறைவு செய்து, பாதுகாப்பாக பூமியை வந்தடைந்துள்ளனர்.

இந்தியாவைப் பொறுத்தவரை இது திருப்புமுனையான பயணமாகும். ஏனெனில், சர்வதேச விண்வெளி நிலையத்துக்கு சென்ற முதல் இந்திய வீரர் சுபான்ஷு சுக்லா தான்; கடந்த 1984-ஆம் ஆண்டில் ரஷிய விண்கலத்தில் விண்வெளிக்குச் சென்ற இந்திய வீரர் ராகேஷ் சர்மாவுக்குப் பிறகு விண்வெளிக்கு பயணித்த 2-ஆவது இந்திய வீரர் இவர்.