தங்கக் கடத்தல் வழக்கு: அமைச்சர் ஜி.பரமேஸ்வருக்கு சொந்தமான கல்வி நிறுவனங்களில் தொடரும் சோதனை

நடிகை ரன்யா ராவ் தங்கக் கடத்தல் வழக்கில் பணப்பதுக்கல், அன்னியச் செலாவணி மோசடி தொடர்பாக கர்நாடக உள்துறை அமைச்சர் ஜி.பரமேஸ்வருக்குச் சொந்தமான கல்வி நிறுவனங்களில் இரண்டாவது நாளாக அமலாக்கத் துறை அதிகாரிகள் வியாழக்கிழமை சோதனை நடத்தினர்.

- 

பெங்களூரு, மே 22:

துபையில் இருந்து ரூ. 12.56 கோடி மதிப்பிலான 14.2 கிலோ தங்கத்தை பெங்களூருக்குக் கடத்தி வந்தபோது நடிகை ரன்யா ராவை மத்திய அரசின் வருவாய் புலனாய்வு இயக்குநரக அதிகாரிகள் மார்ச் 3 ஆம் தேதி கைது செய்து, சிறையில் அடைத்தனர்.

நடிகை ரன்யா ராவின் வீட்டில் வருவாய் புலனாய்வு இயக்குநரக அதிகாரிகள் நடத்திய சோதனையில் ரூ. 2.67 கோடி மதிப்பிலான தங்க நகைகள், ரொக்கம் கைப்பற்றப்பட்டன. கடுமையான விதிகள் கொண்ட அந்நியச் செலாவணி பாதுகாப்பு மற்றும் கடத்தல் நடவடிக்கைகள் தடுப்புச் சட்டம், 1974 (கோபிபோசா) இன் கீழ் அவர் மீது வழக்குப் பதிவு செய்து விசாரிக்கப்பட்டு வருகிறது.

சிபிஐ, வருவாய் புலனாய்வு இயக்குநரகம் ஆகியவை அளித்த புகாரின்பேரில், நாடு முழுவதும் தங்கக் கடத்தல் தொடர்பாக வழக்குகளைப் பதிந்து அமலாக்கத் துறை விசாரித்துவருகிறது. பணப்பதுக்கல் தடுப்புச் சட்டத்தின் கீழ் அன்னியச் செலாவணி மோசடி, நிதிமுறைகேடுகள் குறித்தும் அமலாக்கத் துறை விசாரணை நடத்தி வருகிறது. இதில் நடிகை ரன்யா ராவின் தங்கக் கடத்தல் வழக்கும் அடங்கும்.