பெரம்பலூரில் அடிப்படை வசதிகள் இல்லாத அரசுக் கல்லூரி

மாணவ, மாணவிகள் அவதி

- நமது நிருபர்

நமது நிருபர் பெரம்பலூர், மார்ச் 11: பெரம்பலூர் மாவட்டம், குரும்பலூரில் உள்ள அரசுக் கலை மற்றும் கல்லூரியில் பயிலும் மாணவ, மாணவிகள், அடிப்படை வசதிகளின்றி அவதிப்படும் நிலை நீடிக்கிறது.

பெரம்பலூர் மாவட்டம், குரும்பலூரில் கடந்த 2006-இல் பாரதிதாசன் பல்கலைக்கழகத்தின் உறுப்புக் கல்லூரி ஆண், பெண் என இருபாலரும் பயிலும் வகையில் 24 பாடப் பிரிவுகளுடன் தொடங்கப்பட்டது. இதையடுத்து இக் கல்லூரியானது, கடந்த 2019-ஆம் ஆண்டில் அரசுக் கல்லூரியாக மாற்றி உத்தரவிடப்பட்டது.

ஏழை, எளிய மாணவர்கள்: இக் கல்லூரியில் காலை, மதியம் என சுழற்சி முறையில் நடத்தப்படும் பாடப் பிரிவுகளில் சுமார் 3 ஆயிரத்துக்கும் மேற்பட்ட கிராமப்புற மாணவ, மாணவிகளே அதிகளவில் பயில்கின்றனர். இங்கு பெரம்பலூர் மாவட்டம் மட்டுமின்றி சேலம், திட்டக்குடி, கடலூர், கள்ளக்குறிச்சி உள்ளிட்ட பல்வேறு பகுதிகளைச் சேர்ந்த ஏழை மாணவ, மாணவிகள் பயில்கின்றனர்.