சிங்கப் பெண் படையில் புதிதாக 2,500 பணியிடங்கள்

முதல்வர் விஜய் அறிவிப்பு

- 

சிங்கப் பெண் சிறப்பு அதிரடிப் படைக்கு ரூ.354 கோடி ஒதுக்கீடு செய்யப்பட்டு புதிதாக 2,500 பணியிடங்கள் உருவாக்கப்படும் என்று முதல்வர் ச. ஜோசப் விஜய் அறிவித்தார்.

தமிழகம் முதல்வரும், தமிழக வெற்றிக் கழகத் தலைவருமான ஜோசப் விஜய், சட்டப்பேரவைத் தேர்தல் பிரசாரத்தின்போது பெண்களுக்கு எதிரான குற்றங்களுக்கு முற்றுப்புள்ளி வைக்கும் வகையில் சிங்கப் பெண் சிறப்பு அதிரடிப் படை உருவாக்கப்படும் எனத் தெரிவித்தார். இதை அமல்படுத்தும் விதமாக முதல்வராக ஜோசப் விஜய், கடந்த மே 10-ஆம் தேதி பொறுப்பேற்ற போது, சிங்கப் பெண் சிறப்பு அதிரடிப் படை உருவாக்கும் ஆணை உள்ளிட்ட மூன்று கோப்புகளில் கையொப்பமிட்டார்.

இந்த அதிரடிப் படையின் தொடக்க விழா சென்னை எழும்பூர் ராஜரத்தினம் விளையாட்டரங்கில் செவ்வாய்க்கிழமை மாலை நடைபெற்றது. இந்த நிகழ்ச்சியில் சிங்கப் பெண் சிறப்பு அதிரடிப் படை சேவையை தொடங்கிவைத்து முதல்வர் ஜோசப் விஜய் பேசியதாவது: பெண்களின் பாதுகாப்பை உறுதி செய்வோம் என்று தேர்தலின் போது கூறினோம். அதைச் செயல்படுத்தும் விதமாக சிங்கப் பெண் சிறப்பு அதிரடிப் படை தற்போது தொடங்கப்பட்டுள்ளது. தேர்தலின் போது சொன்ன அனைத்தையும் செய்ய வேண்டும் என்பதில் தெளிவாக இருக்கிறோம். அதனால்தான் ஆட்சிக்கு வந்த குறுகிய நாள்களில் இந்தத் திட்டத்தை நடைமுறைக்கு கொண்டு வந்துள்ளோம்.